ربنا يهدى سرك

ربنا يهدى سرك يا بنتى دعوة جميلة كانت بتقولهالى زمان مش زمان اوى يعنى من حوالى ست سنين كده الدادة اللى كانت مثال للحنان والطيبة وتقريبا هى اللى ربتنى والتى ادعو لها بالرحمة وادعو كل ما يقرا هذا البوست مشاركتى فى ذلك زمان مكنتش فاهمة يعنى ايه سرك ديه كنت متخيلة اسرارى مكنتش بهتم بسمع من هنا واخرج من هنا ممكن تكون ايه اسرار لفتاة فى مازالت فى مقتبل العمر عندها امل كبير فى مستقبل مشرق لا تلق بالا لشئ ضحكاتها تملا المكان عندها كم كبير من الصديقات وام حنونة واب طيب ووديع ولا يرفض لها طلب الان وبعد مرور خمس اعوام على وفاة الدادة تغيرت معهم مجرى حياتى تماما اتوق واشتاق ان اسمع هذه الدعوة مرة اخرى بعد ما ايقنت تماما معناها وعرفت ماذا تعنى كلمة سرك فسرك هو داخلك مكنونك الذى لا تقدر على البوح به لاحد سرى فى فشلى فى علاقة زوجية لم تدم سوى عام تجرعت فيه الالم والحزن ولقبت بلقب اكرهه ويكرهه معى المجتمع الذى اعيش فيه والذى يدين دائما المراة المطلقة وموت والدى الذى ترك جرح كبير بداخلى وانفضاض صديقاتى عنى الواحدة تلو الاخرى حتى اصبحت بل صديقات الكراهية والسواد داخل القلوب التى اعمل معهم والنفاق الذى اضطر ان اتقبله على مضض وهذه الابتسامة الصفراء التى اضعها على وجهى بالرغم من كراهيتى لها الوحدة التى اعيش فيها برودة فراشى التى تدفعنى دائما للهروب من النوم فيه والنوم على الكنبة فى حجرة الجلوس احساسى بالملل الذى يقتلنى وعدم استمتاعى باى شئ حتى الاشياء التى كنت احبها فبجد محتاجة اوى اسمع الدعوة ديه دلوقتى وخصوصا لما تكون من قلب مفعم بالطيبة يتمنى لى الخير كل الخير

تقفيل صينى

دايما عندى عقدة من الصناعة الصينية وكل حاجة صينى وعمرى ما حبتها لان معروف انها رخيصة وعلى اد فلوسها زى ما بيقلوا يعنى لما تبوظ مش حنزعل اوى عشان تمنها قليل وللاسف دلوقتى كل حاجة اصبحت صينى حتى الفاكهة والهى فى تفاح صينى مالوش طعم وتحس انك بتاكل سفنج دايما لما بختار لبسى وخصوصا الجينز بركز اوى انه لازم يكون سنييه ماركة يعنى مش تقليد عشان ايه معرفش يمكن اتعودت على كده ومن كام يوم رحت للمحل اللى دايما اشترى منه لبسى وواثقة فيه واخترت بودى عجبنى ودفعت فيه تمن كبيربس مش مهم عجبنى وهو الواحد حيعيش ويلبس كام مرة يعنى وبعد مروحت قلت ااقيسه على الجينز عشان اشوف شكله حيكون ايه على وجيت عشان ااقطع التكيت لاقيته مكتوب عليه صنع فى الصين اتجننت وحصلت لى حالة هسترية صينى وبالسعر ده كمان اتصلت بالمحل بس للاسف كان قفل اخدته معايا الشغل تانى يوم ومريت على المحل بعد الشغل واستقبلتنى البائعة بابتسامة بلهاء زيها قلتلها البودى ده صينى وبمنتهى البرود لا يا فندم ده متقفل فى الصين افندم انا باعلى صوتى ايه متقفل فى الصين هو عربية ولا ماكينة لا يافندم بس الخامة مستوردة والديزاين انما متفصل فى الصين فقلتلها اه يبقى صينى لا يافندم متقفل فى الصين كنت شوية وحشوطها بجد باردة ومش فاهمة حاجة طب لوسمحتى انا حرجعه وبعدين عيب تبيعوا الحاجة على انها ماركة وهى تقليد خامس مرة لا يا فندم هى متقفلة فى الصين طب لوسمحتى مش عايزه عايزة فلوسى ومش معقول بودى صينى وبالسعر ده يافندم والهى ما صينى مش مهم صينى ولا فرنساوى عايزة فلوسى ولما صاحبة المحل حست انى حعلى صوتى والزباين حتاخد بالها طبعا جت واعتذرت وحاولت تفهمنى ان الماركة ديه فتحت خط انتاج ليهم فى الصين اعتذرتلها انى مش بحب الصناعة الصينية عندى عقدة منها بصت لى باستغراب وقالت لى غريبة مع ان كل حاجة دلوقتى بقيت صينى وتايلاندى

من الذى يصنع الروتين

هل نحن الذين نصنع الروتين ام هو الذى يصنعنا دائما ما اشكى من الروتين اليومى لكنى اكتشفت الاتى تقريبا طقوسى كما هى منذ سنين لا احب ان اغيرها دائما ما يوجد حنين بينى وبين الاماكن فدايما ازور نفس الاماكن واطلب نفس الاشياء يعنى الرستروان هو مش بغيره والطبق المعتاد بيكاتا بصوص المشرم او فيليه مشوى مع سوتيه ونفس المشروب بعد الاكل بيبسى دايت حتى المحلات اللى بشترى منها اللبس مش بحب اغيرها والكوافير بتاعى من مثلا عشر سنين ولون شعرى الكستنائى مع بعض خصلات اللايت وتقريبا نفس التسريحة لما بيطلب يغيرهالى برفض الشوارع اللى بمشى فيها وانا رايحة الشغل تقريبا نفس الطريق مع ان فى طريق مختصر وااقرب بس انا اخدت على ده نفس السوبر ماركت اللى بشترى منه احتياجاتى ونفس الاصناف من بقالة وخلافه نفس نوع البن البرازيلى المحوج وسط ولا فاتح ولا غامق مطربتى المفضلى اليسا مش بغير السى دى بتاعها من كاسيت العربية ساعات بسمع نجوم اف ام مش برتاح الا لصوتها نفس شط البحر اللى برتاده منذ ايام ماكنت طفلة وبعد كل ده ااقول ايه الرتابة ديه مفيش جديد مش عارفة بخاف من التغيير ولا متعودش انى اغير ولو غيرت برجع تانى لقديمى بحس انى مش واخدة على الجديد حتى لو كان احلى من القديم بجد بحسد الناس اللى كل يوم فى لوك جديد وطريقة جديدة واسلوب حياة جديد حتى علاقاتى مع الجنس الاخر لومكنتش علاقة حب فى نطاق المسموح بيه مش بعملها يعنى مينفعش اكون مصاحبة واحد لمجرد انه صديق او زميل عمل واخرج معاه واعيش حياتى عشان اخرج من الملل واغير

ساحر ايها النت

من فترة صغيرة كنت لم اروح اى كافيه والاقى الكل قاعد وفاتح اللب توب استغرب عليه وقول يعنى خلاص مش قادر يستغنى عن النت ولو شوية صغيرة وكانت علاقتى بالنت بسيطة جدا مجرد شات مع صاحابتى اللى نقصوا واحدة ولا التانية واصبح معنديش حد عشان اتشات معاه وبكره اوى اتشات مع حد معرفهوش محاولتش اساسا لحد معملت المدونة بتاعتى وبجد وصلت لدرجة ادمان للنت تقريبا معظم وقتى حتى والهى فى الشغل حبيت المدونة ديه اوى وحبيت عالم التدوين والمدونين صحيح احنا مش بنعرف بعض بس من خلال مدوناتهم بنقدر نقراهم عموما النت شغل عندى الفراغ الرهيب اللى كنت بعيشه خصوصا بعد مبخلص الشغل واروح البيت بقعد علنت لحد منام وغالبا مبقتش اتفرج علتلفزيون خالص احسن برضه ومتعة جميلة ارسال التعليقات والرد عليها ولما تحس ان فى حد مهتم بيك من غير ميعرفك شخصيا يعنى بيهتم بيك لنفسك ولمدونتك وبس يوم الخميس اللى فات ولانى مدمنة خروج يوم خميس من ايام المدرسة اصبحت عادة عندى لازم اخرج اتعشى برة البيت حتى ولو سندوتش كبدة اسكندرانى اللى بموت فيها المهم اخدت اللب توب ورحت كوستا وطلبت لاتيه بتاعى الويتر هناك حفظنى كويس واستغربوا اوى لما لاقونى جايبة اللب توب بس بصراحة الزحمة والصوت العالى مخلونيش اركز فى حاجة بسرعة خرجت وروحت البيت وتقريبا قبل ما اى حاجة كنت بفتح شنطة اللب توب بجد يالك من ساحر ايها النت

يا اسرارك يا ريم

صديقتى الجميلة شاشا صاحبة المدونة الممتعة جاليرى مررت لى كراسة الواجب ومن قوانين الواجب 1-امرره لسته من المدونين مع ذكر اسمائهم 2-اعلمهم بموضوع الواجب 3-والواجب هو انى اذكر ست اشياء عن نفسى لا يكتشفها فى من يرانى لاول مرة . السر الاول ; محدش بيقدر يعرف عمرى الحقيقى دائما بيفتكرونى لسه طالبة فى الجامعة وديه حاجة جميلة بس ساعات بضايقنى السر التانى ;شكلى هادئ ومظهرى بيدل على الطيبة بس الحقيقةا ناا عكس كده متهورة جدا واعشق قيادة السيارات بسرعة طائشة السر الثالث ;بثق فى الناس بشكل فظيع ودايما اخد بمب وخوازيق عادى اتعودت على كده والمصيبة انى مش بتغير السر الرابع ;بحب اوى اعمل اللى انا عايزه وعايشة حياتى على طبيعتها ومش بحب اتفلسف كتير لو مش فاهمة حاجة مش بفتى بقول مش فاهمة السر الخامس ;مفتقدة الحب والحنان بجد نفسى فى حد يطيطب على وياخدنى فى حضنه من غير مصلحة ولا نفاق السر السادس ;كثيرة البكاء غالبا يوميا ببكى بس مش نكدية بغير المود على طول الحمد الواجب تم دلوقتى حمرره لصديقتى كريمان صاحبة مدونة قطرات من شواطئ الحياة وصديقى احمد عبد اللطيف مدونة هلاوس و شادى اصلان ومعنديش حد تانى مكن امرره الواجب لان مدونتى لسه جديدة ومعنديش مدوننين اصدقاء

نور

فوجئت بمكالمة تيلفونية من ماما فى غير توقيتها المعتاد فهى غالبا تكلمنى صباحا لتطمئن انى وصلت الشغل سالمة غانمة ومساء لكى تنصحنى بعدم فتح الباب لاحد والتاكد من احكام غلق الغاز هكذا هى امى دائما فى الستين من عمرها طيبة جدا وحنونة وعطوفة وعندها فوبيا القلق على متدينة جدا ومتمسكة بتعاليم ربنا وغالبا لا تترك القران الكريم من بين يديها كلمتنى وانا فى العمل وبها نبرة صارمة ريرى هكذا هى تدللنى اعملى حسابك احنا مش حنصيف فى الساحل الشمالى جهزى نفسك احنا حنروح تركيا افندم تركيا ازاى واشمعنى وامتى وفين !!! ردت ايوه انا اتصلت سالت شركة سياحة وتكاليف الرحلة رخيصة جدا يمكن الساحل تكلفته تكون اكتر انتى بس حضرى نفسك !منذ فترة ليست بالقليلة وامى تتابع حلقات المسلسل التركى نور وقد ادمنته جميع مواعيدها مترتبة على ميعاد عرض المسلسل تنتظر الحلقة قبلها بنصف ساعة وتعد لنفسها كوب النسكافيه ليعطيها مزيد من الانتباه وبعد الحلقة تتصل باحد صديقاتها لمناقشة وتحليل الحلقة عموما انا معرفش المسلسل ظروفه ايه بس اعتقد انه قصة حب المسلسل لاقى اقبال كبير من مختلف الطبقات والاعمار حاولت اعرف ماذا يشد سيدة فى الستين من العمرلقصة حب بين بطل وبطلة وحرصها على متابعتها فسالتها ايه اللى بيعجبك فيه قالت لى نور البطلة بسيطة ورقيقة وجذبت المشاهدين وتعاطفوا معها والمناظر الطبيعية ادموسفيرنفسه بتاع البلد شد امى اليه لدرجة انها تمنت انها تزوره هكذا هو الفن والاعلام الناضج بعيدا عن المسلسلات المصرية باستفزازها وتكرار احداثها وبطئها وتكلف ممثلاتها فى البس والمكياج وطريقة الكلام والقصور الفاخرة وكأن كل المصريين يعيشون فى هذه القصور الفخمة وعندما شعرت بعدم التحمس فى السفر معها من عموما لو مش حتيجى حطلع انا وطنط صافيناز هى كمان نفسها تشوف االبلد على فكرة طنط صافى ديه من اشد المعجبات بمسلسل نور

التدوين

لى زميلة فى العمل لها مدونة كنت دائما ما ارها منهمكة فى الكتابة كل ما ادخل عليها المكتب وعندما سالتها هل تتدونين مذاكراتك اخبرتنى بامر المدونة والحقيقة كنت اول مرة اسمع عنها وقالت لى اعمل لنفسك واحدة انتى كمان سالتها ايه السبب قالت لى حتسليكى ولو عندك اى هوايات مكبوتة زى حب للقراة او الكتابة او الرسم خرجيه فيها فقررت انشئ مدونة لى وتكون بديل للصديقة التى فشلت ان اعثر عليها اخرج فيها فرحى وحزنى افرغ شحنة الكبت اللى عندى ومش مهم حد يعرفها ولا لا او حد يزورها ولا لا اكيد طالما علنت عمرها محتكون مجهولة ممكن فى يوم من الايام حد يزورها غالبا البوستات بتكشف شخصية مدونها من اهتمامته رومانسى قاسى واقعى بس المصيبة ان قريت ان مدونة مشهورة جدا لسيدة شاعرة وفليسوفة فى بعض الاحيان ومحللة نفسية احيانا اخرى طلعت فى الاخر انها لرجل فى الستين من العمر بعد خروجه على المعاش ويقضى وقته غالبا بين الاربع جدران ففكر انشاء مدونة له تحت اسم انثوى جميل ووضع صورة اشد جمالا ولاقت مدونته اقبال كبير لانه كان جرئ جدا فى مواضيعه حتى ان احد وصل عدد زائرى مدونته فوق العشر الالاف ولكنه اخيرا حب ان يكشف عن نفسه ويعلن انه مجرد وهم الغريبة انه ان اعلن عن نفسه عادى كان ممكن يستمر تانى حاجة ايه السبب التزييف بالعكس كان ممكن يستغل فرصة ان محدش شايف حد ولا عارف حد ويفضفض عن نفسه بصدق بدون رتوش او اصطناع امبارح مثلا قريت بوست لشخص بيتكلم فيه عن احساسه بابنته الرضيعة وهى بتعيط وكان صادق اوى وهو بيوصف ازاى البنت بتعيط وكان بوست جميل عشان طبيعى اوى انا عندى مشكلة ساعات اجى اكتب وبعدين اكتشف انى مش لاقية حاجة اكتبها بس اول ما احط ايدى على البورد الاقى نفسى مسترسلة فى الكتابة مش مهم بكتب ايه المهم انى بكتي وخلاص وبرتاح بعد كده بس ساعات لم ااقرا البوست بقول ايه الجنان ده اللى ان كتبته

استفزاز

منبسطش لزيارتى للاسكندرية المرة ديه مش عارفة بكره الزحمة وهى زحمة موت ورطوبة عالية يعنى اكتر حاجتين مملين فى الدنيا حتى الجزيرة بتاعتى اللى مباخدش راحتى الا عليها بعض المتطفليين وصلولها مش عارفة الناس بقيت عاملة كده ليه بجد مينفعش تنعم باى نوع من الخصوصية تحرشات فى كل مكان حتى الاماكن المفروضة بتكون كلاس شوية المجتمع كله تحول لنوفوروش واحدة صاحبتى كانت فى مارينا واتعرضت لنفس الغلاسة بجد مش عارفة ليه الناس مش بيتسيب الواحد فى حاله يلبس اللى يلبسه ولمزيد من السخافة مثل بكرهه موت نفس كراهيتى للمجتمع الحشرى اللى احنا عايشين فيه كل اللى يعجبك والبس اللى يعجب الناس اشمعنى مش فاهمة من البس اللى يعجبنى واكل اللى يعجبنى واعمل اللى يعجبنى بس طبعا فى حدود عاداتنا وتقاليدنا والمستفز اكتر لما ادخل اى مكان تملؤها المتحجبات والمتوشحات بالسواد وينظرو لى نظرة استنكار بما معناه ايه اللى انتى عماله فى نفسك ده ان مش ضد الحجاب بالعكس ان نفسى اتحجب بس الطرحة بتخنقنى ماما لما بتشوفنى اصلى واقرا قران تقولى مانتى كويسة اهو اتحجبى بأ ربنا يهديكى وبندخل فى مناقشات عقيمة والموضوع يقلب خناق وواحدة زميلتى بنوتة صغيرة لسه متخرجة مامتها اجبرتها على لبس الحجاب عشان قال ايه الشباب اليومين دول عايزين عروسة متحجبة قمة الاستفزاز نفسى الناس تعرف ان الايمان فى القلب وبين الانسان وربه بنات عندنا فى الفندق طبعا عشان الفندق بيمنع لبس الحجاب يقلعوا الحجاب فى الشغل ويلبسوه وهم مروحيين وفى الكوافير البنات يشتغلوا من غير طرحة مع ان فى رجالة بتشتغل معاهم ويلبسوه وهم مروحين ليه يا جماعة بتعملوا كده عشان عيب ميصحش بذمة ايه ده جنان رسمى والهى

الاسكندرية

الجو خانق بالقاهرة حر ورطوبة عالية موت يخنق بجد بالرغم انى عندى تكييف فى العربية والشغل والبيت واى مكان اروحه لازم يكون مكيف لانى عدوة الحر شمس الصيف بتناتبنى حالة من الاختناق ومبقاش قادرة اخد نفسى من قلة الاكسجين فى الجو قررت وانا فى المكتب ااقضى عطلة نهاية الاسبوع فى الاسكندرية بالرغم من زحامها هذه الايام بس انا بعشقها انا من مواليد اسكندرية وقضيت هناك تقريبا نصف عمرى متنقلة بينها وبين القاهرة الاسكندرية لها طعم خاص بشوارعها الحلزونية وكورنيشها الجميل ورائحة اليود ببحرها كل شئ فيها جميل اعشقها خصوصا بالشتاء هدوءها وبحرها وجوها الممطر الرومانسى هناك كافيه اسمها بست رودس وهو على البحر لم تقعد فيه كانك قاعد فى نصف البحر خصوصا لما كنت اروحه فى بداية الشتاء قبل ما يغلق ابوابه للشتاء ويكون الموج عالى ورذاذ الموج يغرقنا ونتواصل فى الضحك انا وصديقاتى بجد كانت ايام جميلة بس لالاسف الكافيه ديه لما زورتها من شهرين طبعا كانت حالتها فى الاخر يرسى لها لحد ما قفلت خالص كنت عاشقة لكافيهات الاسكندرية ذات الطابع اليونانى زى ايليت وسنتفور كان ليهم مذاق خاص مختلف الجاتوه والكرواسان والمخبوزات عموما كل شئ اتغير فى السنتين الماضين بعد ما احتلت الكافيهات ذات الطابع الايطالى البلد وقضت على بقية الكافيهات كل حاجة بتتغير الا طعم الاماكن على راى محمد منير طعم البيوت هو الوحيد اللى بيفضل الاماكن ليها رائحة مميزة تشدك ليها عموما اخدت عربيتى واستئذنت بدرى ويا فكيك على الاسكندرية طبعا الطريق كان زحمة اوى كانه وسط البلد لحد موصلت اسكندرية اكتشفت انا موبيلى كان مقفول كل الوقت ده وماما قلبة الدنيا على محبتش ااقولها انى رايحهاله لانها طول الطريق بتتوتر وتوترنى معاها اول مادخلت اسكندرية واستقبلتنى ريحة اليود قفلت التكييف وفتحت زجاج العربية عشان اتنفس الريحة اللى بعشقها وتدينى باور وترفع من حالتى المزاجية اللى على طول في الحضيض اول ما وصلت غيرت هدومى ولبست فستان خفيف وسابو واطى ونزلت للبحر عشان اسلم عليه لانه حبيبى عشقى الاول والاخير

منذ فترة اكتشفت انى لم يعد لى صديقات واحدة اواثنتان على الاكثرلا اعرف السبب تحديدا فى ذلك غالبا كنا جروب لذيذة نتقابل دائما فى الويك ايند خصوصا يوم الخميس لانه بيكون تانى يوم اجازة لو حد بيشتغل او لواحدة عندها اولاد فى مدرسة بنتجمع ونروح اى كافيه او رسترون ونتعشى ونقعد قعدة لذيذة بس الجروب ده ابتدا يقل واحدة ورا واحدة ورا واحدة لحد مبقاش غير انا وواحدة بس يمكن احنا اكتر اتنين كنا كلوز اوى مش عارفة سبب معين فى ان الصداقة فقدت معناها فى الزمن ده الحياة علمتنى انى معتمدش على حد بس ساعات بكون محتاجة حد افضفض معاه ويكون قريب لى اوى يعنى بيعرف كل اسرارى يعنى اقدر احكي له على كل حاجة من غير مخجل منها اعرى نفسى اكشف نفسى تماما ساعات اقدر بحس انى نفسى ابكى فى حضن حد ويرتب على بحنان ويضمنى ليه ياريت اى حد يكون عنده فى حياته الصديق ده يتمسك فيه وميفرطش فيه ابدا اتعودت من كتر ما اخدت بمب من صديقاتى انى مثقش فى حد مش قادرة افهم ازاى تكون اعز صديقاتى وتقريبا مع بعض يوميا تعمل عيد ميلادها وتعزم الكل وانا لا تصرف غبى من واحدة اكثر غباوة وواحدة تانية تعتبر قريبة منى اوى برضه عملت عملية تجملية فى جسمها ومحبتش تقولى ليه ايه السبب ليه النفوس وحشة كده اوى وواحدة تالتة اعتقد انها مجنونة كل ملاحظة ااقولهالها تعتبرها اساءة ليها وتفسرها غلط عموما انا حياتى كده عجبانى وطز فى اى حد

روتين نهارى

استيقظ عادة فى الساعة السابعة ادخل الى مطبخى لاضع الماء ولحليب ليسخنوا فى هذه الاثناء ادخل الى الحمام لامارس طقوسى اليوميه اضع غسول البشرة على وجهى واغسل ا اسنانى جيدا ثم افتح مياه الدش لاستمتع برذاذ المياه يداعب جسدى ويعطينى المزيد من الانتعاش ثم ارتدى روب الحمام واسرع الى المطبخ اكتشف ان اللبن اتسكب كالعادة اصنع لنفسى كوب من النسكافيه بالحليب ادخل الى غرفتى اضع الكوب بجوارى على الكمود وارتشفه اثناء وضعى لمساحيق التجميل عموما لا احب ان اضع منها الكثير اثناء العمل بضع من اللمسات الخفيفة تعودت ان استمع الى صوت الشيخ السدايسى صباحا اعشق صوته واصلى الصبح ثم ارتدى ملابسى سريعا واضع اشيائى فى شنطتى نظارتى مفتايحى مناديل مبللة بارفيوم بعض من ادوات التجميل تقريبا وانا اهم بالخروج ادخل الى المطبخ لاصنع لى سندوتش صغير استمتعت بقضماته وانا استقل المصعد للنزول القى تحية الصباح على اسرة عم عبده البو اب واركب سيارتى لاذهب الى الفندق الكبير الذى اعمل به فى الزمالك عموما انا اسكن فى المهندسين المسافة ليست بعيدة ادخل الى الفندق الذى تدب فيه الحياة منذ الساعة السادسة صباحا اتوجه الى مكتبى والقى بتحية الصباح على زملائى ثم اطلب من خدمة الغرف مج من القهوة مظبوطة ارتشف منها رشفة وراء رشفة وعندما يفرغ الكوب وقتها فقط ابتدى فى استيعاب ما يدور من حولى لامارس بقية روتينى اليومى فى العمل

روتين روتين روتين كل شئ اصبح روتينى ومعتاد مغلف بكساء من التكرار يصعب الافلات منه حتى هو اصبح عادة فى حياتى كفنجان قهوتى الصباحية وكتنظيفى لاسنانى بعد كل وجبة وغسيلى لوجهى وتنظيفه من مساحيق التجميل قبل النوم حبيبى ارجوك انفض الغبار الذى الم بعلاقتى بك ارجوك ما عد اشعر بك ولا بلمسة يديك وكرهت سؤالك الروتينى الذى تكرره على فى اليوم بل فى المكالمة الواحدة ايه الاخبارتريد ان تعرف الاخبار اليك اخبارى كل شئ روتينى وملل حتى علاقتى بك كساها الصدا