عمر الشريف

انهاردة بعد الشغل كنت زهقانة شوية اقترحت على واحدة صاحبتى اننا نتغدا برة وبعدين ندخل سينما قشطة الفكرة عجبتنى خصوصا انى كان نفسى اشوف فيلم عادل امام وعمر الشريف سمعت من ناس كتير انه حلو وعلى فكرة انا مش بحب السينما الا طبعا اذا كان فيلم يستاهل وبما ان افلام الايام ديه متستاهلش من فترة مدخلتش سينما غالبا افلام خالد يوسف بس المهم اتغدينا ودخلنا الفيلم بجد جميل اوى وبيناقش فكرة جميلة محتاجين حاجة زى كده تهدى النفوس مش ده موضوعى انا موضوعى عمر الشريف الرجل العملاق فنان عالمى بحق وحقيقى مش ممكن تمثيل ايه وتعبير ايه وشياكة ايه ادى الدور بجمال فظيع بجد مشكلة عمر الشريف كاريزما لوحده وبالرغم من كل السنين ديه بيمتلك نفس الطلة بتاعته وجذابيته وجمال صوته وبريق عينيه مش فرق جامد بينه وبين صراع فى النيل بالرغم من الخمسين سنة اللى عدوا انما لسه محتفظ بنفسه عشان انسان طول عمره محترم بعيد عن الاشاعات والقيل والقال والغريبة انه لسه محتفظ بالزمن الجميل اللى جيه فيه ويثبت وجوده فى زمننا الردئ بجد تحية منى ومن مدونتى لشخصية تجنن عمر الشريف جان وحتفضل طول عمرك جان المشكلة اللى حصلت على ان اسمه يسبق اسم عادل امام على التتر مرت بمنتهى التسامح منه ومداش الموضوع اهمية لانه عارف وواثق من نفسه كويس كل سنة وانت طيب

حاقدون

علفكرة انا ماليش فى السياسة والكلام ده ومش بحبها انا فى نفسى وبس بس بحب مصر اوى ومنتمية ليها لدرجة ان اتعرضت على شغل فى لندن وحياة مرفهة اوى ورفضت وبجد نفسى ااقول للى بيشوه سمعة مصر كفاية حرام لان سمعتنا بقيت على كل لسان على الفضائيات كلها شتيمة فى البلد والحكم مش كده يعنى المهم طبعا اكيد كلنا سمعنا عن الجريمة بتاعة سوزان تميم والشخص المحترم والمحترم جدا اللى متهم بانه دفع 3 مليون دولار عشان يخلص منها بالذمة ده اسمه كلام وللدرجة ديه احنا سذج يمكن يكون كانت تربطه بيها علاقة كل واحد حر بس راجل مهم ومحترم وليه اسمه زى ده عشان مجرد علاقة من اى نوع يضحى بكل ده هشام طلعت مصطفى اتقابلت معاه من حوالى سنتين لانه كان له اسهم فى الفندق عندنا واجتمع بينا مر ة انسان متواضع ومحبوب ده غير ان دماغه مشالله عليها بسينز من الدرجة الاولى اكيد كلكم شفتوه فى العاشرة مساء او فى اى برنامج اللى يسمع هشام وهو بيكلم يعرف اد ايه دماغه كبيرة فيه كام رجل زيه فى مصر كفاية المشاريع اللى عمالها فى مصر الرحاب مثلا قطعة من اوربا رحت لزيارة واحدة صاحبتى هناك واتفجات بجمالها عيشة تانية ومدينتى والربوة ومشاريع عمالقة ده غير بقى سان ستيفانو الفندق اللى كانت بتسكنه الاشباح لاكتر من تلاتين سنة ولا حد عبره ولا حاول يستثمره دلوقتى بقى حتة فندق تحفة ومول ومجمع سكنى وكل حاجة حتقولوا ما ده كله بتمنه والشقق اسعارها غالية ممكن بس التقسيط على 15 سنة يعنى ممكن تتملك شقة ولا فيلا ومستوى سكنى راقى وبالتقسط المريح وكمان كل حاجة غالية ومن حقه انه يكسب كفاية الايدى العاملة اللى بيشغلها فى مشاريعه وشركاته يا جماعة الاشاعة ديه اللى انتشرت وكبرت وبقيت دلوقتى ان سوزان كانت عارفة صفقات سلاح بينه وبين الحكم وافلام عربى وهندى هشام طلعت فيه مؤامرة للقضاء عليه مش عارفة من مين بالظبط ممكن من حد من منافسييه يمكن من برة من دول تانية مش عايزة مصر تتقدم ولا تتطور وتفضل محلك سر عجبكم العشوائيات والحوارى والقرف والهى صاحبتى بتقولى ان شركات السياحة دلوقتى بتعمل جولة للسياح عشان يتفرجوا عليها حاجة فعلا تشرف لان السياح لازم يشوفوا قديم وجديد بجد نفسى كل واحد خليه فى حاله ومالوش دعوة بحد والكل زعلان ان النشر فى الموضوع ده ممنوع طبعا احسن حاجة ان الصحافة الصفراء اللى مورهاش غير التقطيع فى سير الناس تبطل شوية والحاقدين اللى ولا منهم و من كفاية شرورهم اى حد عنده نسبة ذكاء واحد فى المية كان حيتاكد ان رجل له سمعته ومكانته مينفعش يفرط فيها بالشكل ده وعشان خاطر مين وايه بس احنا للاسف اى حاجة تتأل ادامنا نصدقها علىطول مبنحاولش نشغل عقلنا علفكرة انا مش قريبته ولا تربطنى بيه علاقة خاصة ولا واخدة منه فلوس عشان الكلمتين دول انا بس استفزيت حوار فى المكتب بين اتنين من نوعية مروجى الاشاعات عن الرجل ده ومتاكدة ان الايام حتثبت كلامى

رحلة الى السوبر ماركت

'طبعا بعد الحاح من مامتى عشان اروح معاها نشترى حاجات رمضان كل سنة وانتم كلكم يارب طيبين اكيد انا مكنتش عايزة اروح عشان الصراحة انا ماليش فى المواضيع ديه مش بحبها بس ماما كانت مصرة يوم الجمعة خلصت شغل بدرى وروحت لقيتها لابسة ومستانيى يالا عشان منتاخرش الحاجة حتخلص من السوبر ماركت وحنروح نلاقى العروض كلها خلصت طبعا ولا كلمة ممكن ااقول ايه طيب حنروح اى سوبر ماركت كارفور يانهار ابيض ماما كارفور وانهاردة الجمعة وقبل رمضان وعروض يعنى حرام زحمة طحن مش عايزة ااقولكم اننا عندنا على اخر الشارع سوبر ماركت كبير سعاره جملة بس اعمل التحكمات ياماما حيكون زحمة موت مش حنعرف ندخل طبعا جريدة الاهرام يوم الجمعة كان فيها صفحة بحالها عن العروض اللى زغللت عين ماما لا كارفور يعنى كارفور المهمم طبعا رحت وامرى لله مش قادرة ااقولكم المنظر عامل ازاى اصلا من ساعة مشفت البركينج واتاكدت من العذاب اللى حعيشه جوا بالظبط نصف ساعة على مالقيت ركنة ومش قادرة ااقول لكم كم البشر كل واحد خارج وجارر ادامه خمس ست عربيات والهى المهم دخلنا اول مدخلت السوبر ماركت كان حيغمى على بجد مفيش اكسجين والمكان زحمة ودوشة والتكيفات مش عاملة ا ى حاجة لدرجة ان الناس كانهم خارجيين من خناقة وطبعا ماما شافت المنظر ده اتوهمت وهى عارفة مشكلتى مع التنفس فقالت لى اخرجى انتى يا ريم وانا حخلص واكلمك تيجى نتقابل نخرج فعلا كان غصب عنى مش ندالة خرجت اتمشيت فى المول شوية وبعدين حسيت انى جعانة اكلت سندوتش المهم كان تقريبا فاتت ساعة طلبتها عشان اطمن ماما ايه الاخبار وصلتى لحد فين كانت متنرفزة جدا وقالتلى لو عايزة تمشى امشى انا لسه بدرى الحاجة كلها خلصت وادامى ساعة على الكاشير لانه زحمة موت تخيلوا مش عارفة والهى الاسعار هيه هى بس الدماغ بقى طبعا مقدرتش اقاوم ريحة السين بون فدخلت اشتريت واحدة واكلتها ولفيت شوية وخلاص حموت عايزة اروح طلبتها يا ماما ايه الاخبار خلا ص انا علكاشير لسه اعمل ايه اول مخلص حديكى رنة تقبلينى برة غالبا كده عشان مطولش عليكم مرت اربع ساعات عالوضع ده من ضمنهم اخر ساعة بس جر فى الخمس عربيات ونقل الحاجات للعربية ماما قالت توبة من ديه النوبة وقعدت تحكى لى ان الناس بتفتح فى الحاجة وتسيبها ونص البضاعة واقع على الارض والخناقات اللى علكاشير عشان مين يحاسب الاول بجد احنا كاننا مش بناكل الا فى رمضان او ان الاكل حيخلص ومش حنلاقى فتفوتة اى حاجة سباق الناس كانها بتتسابق مين اللى حيوصل الاول للحاجة ومين اللى حيحاسب الاول وعلى راى المثل ساعة البطون بتوه العقول يا جماعة رمضان مقلش كده حرام والهى وبعدين نفسى اعرف اسعار ايه اللى بنشكى منها وكل واحد طالع ادامه خمس عربيات لو كانت الاسعار رخيصة شوية كنا حنعمل ايه المهم واحنا فى العربية لقيت ماما بتقولى ريم حنجيب منين الكحك السنة ديه كحك لابوار كان وحش اوى السنة اللى فاتت والهى كنت عايزة اصوت بس اعمل ايه مقدرتش حد القشطة فى الموضوع انى دلوقتى بكتب البوست وباكل عين جمل حد عايز شوية ورمضان كريم

يعععععععععععععععع

اكيد اول متشوفه المنظر ده حتقولوا يععععععععع انا كمان قلت كده كانت حفلة فى الفندق لوفد اجنبى وده كان الطبق الرئيسى اللى الشيف طبخهلهم مخصوص الصورة الديه اتاخدت للخنزيرة الجميلة ديه بس بعد ما ادبحت واطبخت واتحشت بالارز والمكسرات على موبيل احد العاملين فى الفندق اللى بدوره وزعها علفندق كله من باب القرف يعنى سبحان الله تخيلوا لو ديه كانت صورة خروف محشى كنا حنعمل ايه اكيد نفسنا كانت حتتفتح للاكل انا كنت قريت مقال للشيخ زغلول النجار الرجل العظيم ده من ضمن تفسيره عن ليه الله سبحانه وتعالى حرم لحم الخنزبر ان ذكر الخنزيز معندوش نخوة مش بيغير على الانثى بتاعته وبارد موت يعنى ممكن عادى يشوف امام عينيه خنزيرته وهى مصاحبة خنزير تانى وديه كانت ولا يتحرك عادى جداوبما ان اى حاجة بناكلها مش بتتهضم كده والسلام لا طبعا احنا بنكتسب صفات من اكل اللحوم الى بناكلها من نفس النوع ده عشان كده مثلا النباتين بيكونوا هاديين وريلكس ومش بيصيبوا بامراض وحاجات كده يعنى بالاضافة طبعا للاسباب اللى احنا عارفناها كويس انه بياكل الزبالة ايه الزبالة ديه معلش القمامة واكل لحمته بيسبب الدودة الشريطية وبالرغم من كده فى قطعة من جسمه من اغلى انواع اللحوم بس خلاص

تاج

تاج جديد مررتهولى قطرات من شواطئ الحياة واجاوب على الاسئلة بس عشان خاطرها السؤال الاول بدات التدوين من امتى ودخلت العالم ده ازاى ؟ تقريبا من شهرين بس ودخلت العالم ده عن طريق زميلة فى الشغل السؤال التانى ايه كان انطباعك فى البداية ؟ مكنتش متحمسة اوى خصوصا مكنتش عارفة اتكلم على ايه ولا فى ايه بس لما احط ايدى على البورد بكتب باستفاضة كمان وممكن اكون محضرة حاجة اتكلم عليها وبعدين وانا بكتب اغيرها واكتب عن حاجة تانية خالص بحب اوى موضوع التعليقات ده ارد عليها واعلق عند اصحابى المدونيين اتعرفت على ناس جميلة وبعتز بيهم مين اكتر واحد بتعتز بتعليقه على بوستك الجديد ؟ صديقتى الجميلة شاشا بحبها اوى وبفرح لما بيكون تعليقها عندى وطبعا دكتور ياسر ثابت عشان رايه بيهمنى اوى انسان واعى وفاهم واكيد كل الى بيعلقوا وبيهتموا يزوروا مدونتى انا بحبهم اوى وبزورهم كمان ايه اكتر حاجة اتعلمتها من التدوين ان الحياة لسه فيها ناس جميلة بتهتم ببعض بعيد عن ا لمصالح والتزييف والنفاق وحتى من غير مااشوفهم ولا يشوفنى ايه اكتر حاجة كرهتها ؟ الصراحة بكره اوى لما ادخل مدونة والاقى صاحبها بيشتم فى مصر وفى البلد وملاحظة ان فى مدونات من النوع ده كتير ومش بحب البنات اللى بتقعد تهرج مع الولاد وقشطة وقمر ويا جميل حاسس ان التدوين له تاثير ؟ اكيد طبعا لما بعرف الافكار بتاعة كل حد وفى مدونات بستفاد منها زى مدونات الفنون والشعر وكده تهدى التاج لمين ؟ حهديه لانسانة جميلة ومدونتها جميلةspaking,ومدونة secret talk

رمضان كريم

كل سنة وانتم كلكم طيبين رمضان قرب جدا عايزة اتكلم معاكم بصدق شوية الصراحة انا فى رمضان بكون عصبية جدا وانتم اكيد كده يمكن عشان مش بعرف افوق الا ماشرب نسكافيه او قهوة الصراحة لما انزل واكون رايحة الشغل مش بكون شايفة قدامى وبعمل حاجات مش بحبها بقعد اشتم فى الناس اللى سايقة العربيات خصوصا انتم عارفين المرور فى رمضان بيكون عامل ازاى ده رقم واحد تانى حاجة الصراحة مش بشتغل بذمة وبنفض لحاجات كتير اوى المفروض اعملها تالت حاجة انى انا مش محجبة ومش بلبس ايشارب فى رمضان اوقات الصيام واقلعها بعد الصيام لان ده نفاق بس بحاول الم شعرى ومحطش مكياج والبس اكتر حاجة حشمة فى الدولاب ولما حد يقولى مش حينفعلك صيام وانتى مش مغطية شعرك بنفضله رابع حاجة طبعا عشان ظروف الشغل بصلى الظهر مع العصر ودايما مش عارفة ليه مش بركز فى صلاتى بسرعة بسرعة وده بيضايقنى جدا ماما بتقولى صلى عدل مش كأن فى حد بيجرى وراكى خامس حاجة واكتر الوقت بصلى وانا قاعدة مش عارفة حاسة ان صلاتى مش حتتقبل سادس حاجة اتعودت انى لازم اختم المصحف فى رمضان فكل يوم بقرا شوية عشان على ليلة القدر اختمه بس بردوه بسرعة ومن غير تركيز المهم انى اختمه وخلاص قبل ما رمضان يخلص الصراحة انا نفسى اغير كل ده السنة ديه واستغل الشهر ده اجمل استغلال انا عارفة انى غلط كل تركيزى فى مسلسلات التلفزيون والعزومات والدش بارتى اللى بنعملها انا وصحابى يعنى كل واحد يعمل صنف معين ونلم الاكل وناكل عند حد وطبعا السحور برة يوم الخميس والجمعة والخيم الرمضانية اللى فعلا بقت وباء واتحولت لنايت كلوب وخصوصا الخيمة اللى فى شارع الهرم مش حقول اسمها بس اكيد كلنا عارفنها كفاية اعلاناتها بيحصل فيها مهازل ورقص ومسخرة وبنات لابسة مش لابسة عادى ولا همهم اى حاجة كأننا مش فى رمضان بجد نفسى يمنعوا الخيم الرمضانية اللى بالشكل وعلى فكرة الخيمة ديه صاحبها لبنانى مارونى ومشارك واحد مصرى بدون ذكر اسماء يعنى مش مشكلة بالنسبة لهم المهم الفلوس وبس انتم عارفين التكيت بكام وبالرغم من كده مفيش كرسى فاضى الفندق عندنا بيعمل خيمة يمكن من شهرين وهو بيوضب فيها وبيتعاقد مع الفنانين اللى بسمع بعد كده انهم بيجوا سكرانيين والهى حتى النوادى شئ اساسى شهر رمضان المفروض ان كله عبادة اتحول لحاجة تانية خالص مش حنكر انى غلطانة انى بروح الاماكن ديه انا لو امتنعت وغيرى امتنع وهكذا بجد حنقدر نعمل حاجة بتمنى من كل قلبى اغير من نفسى السنة ديه واستغل الشهر الكريم ده اجمل استغلال بسم الله الرحمن الرحيم ;كل ان صلاتى و نسكى ومحياى ومماتى لله رب العالمين لا شريك له وبذلك امرت وانا اول المسلمين صدق الله العظيم

حنان

ممكن اجكى لكم علحاجة حصلت لبنت صغيرة بتشتغل عند ماما عندها مثلا عشر سنين طبعا كلكم حتقولوا ياااااا وحرام بس والهى ماما مش بتخليها تعمل حاجة غير انها تفتح الباب ترد على التيلفون تناولها حاجة كده يعنى وربنا يعلم احنا بنعاملها ازاى البنت اسمها حنان سمرة ورفيعة ولطيفة جدا عاملة زى الفراشة اول مرة تشتغل وليها 5 اخوات بنات كلهم بيشتغلوا وبتحب الشغل وعايزة تتعلم كل حاجة طبعا مش حقولكم البنت ديه المعاناة اللى بتعانيها من الحرمان والله العظيم مش عارفة يعنى ايه شيكولاتة ونفسها تاكلها تخيلوا طب حقولكم على حاجة مش حتصدوقها عارفين بتقولى انهم بياكلوا ايه حاجة اسمها حادق عبارة عن ورق كرنب مخلل حالتهم فقر جدا وبابها بياخد الفلوس عشان يعالج اخوها الصغير مريض بفشل كلوى ربنا يشفيه يا رب المهم البنت ديه انا حبتها المخدامتية اللى بتشغلها بتيجى تاخد شهريتها اول كل شهر وعمرنا ما شفنا اب سال عليها ولا ام لحد من حوالى اسبوعين لقينا الباب بيخبط وكان بابا البنت ديه راجل كبير وغلبان جدا المهم ماما قالت له احنا لسه دافعين الشهرية والا انت جى تسلم على بنتك قالها لا انا جى اخدها عشان حنعملها عملية الختان طبعا هو استخدم معنى تانى انا استغربت جدا ورديت قلت له بس يا حاج خلاص محدش بيعمل العمليات ديه دلوقتى وطبعا لسه حتكلم ماما قالت ريم بمعنى اسكتى خالص الرجل بصى لى باستغراب وقال لى كيف يعنى وكان نظرته كلها شر انا هنا طبعا مش حناقش الختان مش ديه المشكلة المهم دخلت علبنت اللى اول ماشافت بابها فرحت جدا وقعدت تبوس فى اايديه وتقله ازاى اما واخواتى لقيتها بتحضر لبسها فسالتها حنان انتى عارفة بابكى عايزك ليه قالت ايوه قلت لها انتى فاهمة حيعملوا فكيى ايه قالت ايوه اخواتى بنات الجيران وقريبى كلهم بيعملوا كده لازم يا ابلة ريم قلت لها لازم ليه تتصورا قالت ايه عشان البنت متبقاش قليلة الادب تخيلوا المهم بابها خدها واكد على مامتى انها اسبوع بالكتير تطيب ويجبها بعد ما مشى ماما قالت لى يا بنتى العادة ديه عندهم مينفعش تتغير زى الثار عند الصعايدة اللى فى دماغهم فى دماغهم تقريبا بعد اسبوعين البنت رجعت بعد ما فقدنا الامل انها ترجع وكنت قلقانة عليها جدا بس رجعت واحدة تانية خالص وشها اصفر وخسة يمكن النص ومنكسرة كده مش عارفة مش بتضحك ولا تلعب زى الاول حتى سالتها قلت لها احكى لى بقى ايه اللى حصل تخيلوا الناس ديه لسه بتعمل ايه الست اللى بتعمل العملية ديه بتجمع البنات الى فى القرية كلها عايزين يتختنوا ويكونوا فى نفس السن قبل البلوغ وتخدهم فى بيت حد منهم وواحدة واحدة بالدور وبتستعمل كل الوسائل البدائية وبدون مخدر ولا حاجة لا وكمان بعد ما تنتهى بتجيب رماد الفرن ويكون سخن وتحطه على الجرح تخيلوا منتهى التلوث والبدائية الناس ديه بتفكر ازاى معقولة بس الاهم ان كل بنت امها بتكون محضرالها ارنب عشان تتغذى كويس سالتها انتى اتالمتى قالتلى اوى ده انا كنت حموت وقعدت اعيط واصوت السؤال اللى بساله الناس ديه ممكن تغير العادات السيئة ديه امتى

عروسة البحر

اكيد كلنا بنحب البحر وكل واحد بيحبه باللشكل اللى يعجبه يعنى فى ناس تحب تقعد على الشط تتفرج عليه وتستمتع جدا انا مش من النوع ده او لما بشوف البحر لازم انزل فيه والهى كنت ساعات بنزله فى الشتا وكل واحد له فلسفة خاصة قضيت مع صديقة يوم على البحر وهى كمان بتحبه اوى بس ليها طريقة معينة فى حبها معاه والهى ااقولكم على حاجة الموج كان هادئ جدا وانبسطنا اننا حنستمتع بالميه وفجاءة وهى نازلة الموج على جدا لدرجة انا احنا قعدنا نضحك وقلتلها البحر بيحتفل بيك ضحكتلى ضحة ليها معنى وقلتلى طبعا فى علاقة خاصة بتربطنى بيه كلامها عن البحر كانها بتتكلم عن صديقها او حبيبها علمتنى حاجة جميلة اوى انا من اول ما الموجة تعلى احب اركبها هى قالت لى جربى تدخلى جواه وتغطسى وترمى فى همومك وحزنك وتنقى نفسك من الذنوب قعدت اضحك قلتلى جربى وحتشوفى وفعلا جربت وحسيت ان كلامها صح كنت يخرج من الموجة منتعشة اوى وكلى تفائل المهم عومنا شوية ولما الموج هدئ تانى قالت لى ارفعى نفسك وطوفى على وش الميه حتحسى انك زى الفراشة وفعلا خصوصا الشمس كانت بتبدى تنزل فى الميه وطيور النورس اللى بحبها اوى بطير فوقينا كان منظر جميل اوى واحساس احلى بكتير قضينا وقت طويل لدرجة لما خرجنا استغربنا اننا بقلنا ساعة ونصف بس محسنيش بيهم فعلا كنا بعيد بعيد جدا عن الارض وقرفها وناسها ومشاكلها كاننا فى عالم تانى والاجمل من كده اننا خرجنا قعدنا على الرمل وقعدنا نرسم صحبتى رسمت قلب كبير وسهمين سهم حطط فيه اول حرف من اسمها والسهم التانى سبته فاضى محبتش اضيقها واسالهاوفجاة سالتنى صحبتى اللى مش عايزة ااقول اسمها عشان متزعلش بتؤمنى بوجود عروسة البحر اكيد اه طالما فى حد زيك بيحب البحر وله فلسفة خاصة اوى كده ناحيته بجد انتى اجمل عروسة بحر شفتها وعلى فكرة نفسى كلكم تجربوا الاحساس ده ونبطل نقول لا انا بحب اقعد برة اتمتعت بالمنظر المتعة الحقيقية انك تنزل عشان حتحس انك بتتولد من جديد لا وفيه ناس تغيظ تقعد علبحر وتخاف للرمل يجى عليها وتبقى مضايقة اوى لو رملية او شوية مية جم عليهم انهارده مثلا فى الشغل كنت مبتسمة طول النهار وقررت افتح صفحة جديدة مع زملائى وهم كمان حسوا بكده وقالو لى الظهار الاجازة جابت نتيجة

الناس ديه انا بحبها

Actually i love them

دكتور فيل ده انا بحبه اوى مكنتش اعرفه كويس لحد معرفت انه نزيل عندنا فى الفندق وعملناله حفل لاستقبال صغيرانسان متواضع وبسيط بالرغم من انه اكبر شخصية اعلامية فى امريكا الابتسامة مش بيفارق وشه لما تشوفه بتشعر انه قريبك صديقك جارك مدرسك يعنى بيديك احساس بالالفة تابعت بعد كده برنامجه ولاقيته فعلا يستاهل اد ايه مثقف ومتفهم لمشاكل النا س يعنى مش بيحاول يعقدهم ويحسسهم انهم عامليين مصيبة ويقعد يقول يااااااا ومعقولة عملت كده ويستخف بالضيف بتاعه عشان كده برنامجه دكتور فيل من اشهر البرامج كنت اتمنى الاقى مذيع فى الفضائيات بتاعتنا زيه كده مش تامر بغلاسته وقلة ذوقه ومعتز بغتاته ومحمود سعد باستظرافه وضحكته الهبلة والحمد الله الخنقة ده اللى اعتزل ممدوح موسى واللى بيقدم العراب معرفش اسمه ايه ممكن يكون جورج قرداحى بس هو ياريت يغير برنامج المسابقات ده ويقدم برامج مختلفة اكيد حتكون ناجحة دلوقتى بقى الجميلة ميس اوبرا وينفرى طبعا هى مش جميلة ولا حاجة بس روحها جميلة جدا وكمان ضحكتها اوبرا من اغنى واشهر نساء العالم بسيطة جدا ومش متكلفة خالص بقالها عشرين سنة بتقدم البرنامج وبيعتبر من اشهر البرامج فى امريكا والعالم بالرغم من انها زنجية ولها اصول افريقية عملت كتير من الاعمال الخيرية منها مدرسة للبنات داخلية على احدث النظم التعليمية للبنات الفقيرة وكل بنت لها مصروف شهرى ورحلات لاوربا شهرية يعنى مدلعهم اخر دلع احنا بقى عندنا كام زى اوبرا طبعا مفيش فى كام مذيعة ليها برنامج ممكن نشوفه ونتابعه باستمرار طنط هالة سرحان مفتكرش خالص كمان ولا منى الحسينى اكيد لا معرفش منى الشاذلى البرنامج بتاعها ناجح بس الصراحة مش متابعه من هنا ومن مدونتى المجهولة ديه برفع القبعة لاوبرا وينفرى ودكتور فيل اللى بحبه اوى

ميس ورلد

ألصور ديه لاشهر نجمات هوليوود انجلينا جولى اجمل امراة فى العالم وبريتنى سبيرس اشهر مغنية بوب واكيد العجوز الشمطاء باميلا اندرسون نجمة افلام البورنو والتانية مش فاكرة اسمها بطلة فيلم تياتنيك طبعا مش مصدقين لا لازم نصدق مع عمليات التجميل والشد والنفخ والنحت والحقن ينفع كل حاجة واحدة صاحبتى كانت سمينة ومعندهاش وسط يعنى جسمها حتة واحدة مش متقسم وكان نفسها يكون عندها وسط راحت لدكتور تجميل مشهور جدا وقالت له يا دكتور انا عايزة وسط طبعا الدكتور قالها مينفعش لازم الاول نشفط البطن ونشدها وبعدين ننحتلك وسط وافقت طبعا وفعلا نحتلها وسط ولا وسط الكامنجة وطبعا كل ستايل لبسها اتغير وبقيت تستعمل الحزام وتقفله على اخر حاجة عشان جمال وسطها يبان دلوقتى بتروح للدكتور وتختار المنظر اللى عايزه لانفك مثلا وشكل العين مسحوبة ولا مدورة عشان كده لما بنشوف كل المطربات الجداد شبه هيفاء بنستغرب عادى ممكن ايوه واحدة تروح وتطلب انف هيفاء وشفايف اليسا وصدر باميلا اندرسون يعنى اى حد مش عجبه شكله ممكن يغيره والشعر من عند الكوافير جميع انواع واطوال الشعر ملصوق او متخيط او متركب يعنى اى واحدة قردة ممكن تكون ميس ورلد

خنقة

عندى اسبوع اجازة والمفروض حقضيه مع ماما وجدتى فى الساحل طبعا انا مش مبسوطة لانى حكون محصارة من ماما وكمان جدتى تقريبا عندها حاجة وتمانين بس اللى يشوفها يفتكرها اصغر من ماما عشان متربية على العز واكل الوز والسمنة البلدى والحاجات ديه هى طيبة وحنينة بس متسلطة جدا وبتدخل فى كل حاجة طبعا وماما كمان نبتدى اليوم ريم لازم تفطرى وان مش بحب الفطار نفسى بتكون مسدودة ومتشربيش قهوة عشان خطر على الصحة بتجيب القلب مش عارفة ايه العلاقة وشوية ريم متنزليش البحر الموج عالى جدا ولازم جدتى تحكى لى جوز بنت اخته غرق ازاى مع انه كان عويم وشوية ماما نتلبسيش مايوه حرام البسى مايوه شرعى وبعدين جدتى مش لازم ننزل البحر كفاية علينا نقعد فى التراس ونشوف البحر من هنا رمل وتلزيق وبعد شوية يا بنتى اقفلى القرف اللى بتسمعيه ده هى ديه اغانى ده وجع دماغ افتحلنا رباعيات الخيام ولا سيد درويش ومش فاكرة المغنى التانى اللى بيقول ليه يا بنفسج بتبهج وشوية طبعا بما انهم بيعانوا من الضغط والسكر فالاكل مخصوص من غير ملح ومن غير سكر والادوية والحقن وبتحول للممرضة فترة بعد الضهر ماما بتنام والحمد لله انما جدتى اللى عندها الزهايمر الذاكرة بتنشط وتفتكر حاجات من ايام الهكسوس ولازم اكون منتبهة والا اسمع مالا يرضينى الساعة 9 انشالله بيكونوا داخلين يناموا يا جماعة طب ننزل نخرج نعمل اى منظر لا نامى يا بنتى احسن ريحى جسمك طب بالذمة اريحه من ايه ولو نزلت لوحدى ماما مش بتبطل اتصال بى كانى حتخطف وطبعا جدتى مبتنساش كل يوم انها تقعد تقولى ليه كده يا بنتى مش كان زمانك معاكى تلت اربع عيال انتى اللى مستحملتيش كل الرجالة كده مفيهمش رجل عدل يعنى بالظبط صراع مش مصيف فكرت قلت لماما عشان هى مقيمة فى اسكندرية بلاش الساحل خلينا فى اسكندرية وهى على الاقل ونس بس طبعا قلتلى لا حرام جدتك عايزة تصيف ايه

سلطة

ايه رايكم فى الصور ديه يعنى من باب التغيير مش لازم الخضار بس منشفهوش الا فى طبق السلطة

صاحب القلم الجرئ

يوم الجمعة اجازتى دايما بقضيه فى ترتيب لبسى والذهاب للكوافير وشراء احتياجاتى من السوبر ماركت لانى غالبا طول ايام الاسبوع من البيت للشغل ومن الشغل للبيت ومعنديش فرصة اعمل اى حاجة تانية يمكن يوم الخميس بس بتعشى برة البيت عشان بيكون الجمعة اجازة واصحى براحتى بس يوم الجمعة اللى فاتت كان له مذاق مختلف يمكن طول اليوم معملتش اى حاجة غير متابعة وقراءة مدونة الطوفان للكاتب الصحفى الكبير ياسر ثابت صاحب القلم الجرئ وهى عبارة عن مدونة شاملة سياسية وفنية ورياضية ونقدية وتحليلة وله اسلوب رائع فى الكتابة يجعلك لا تقدر على مغادرة مكانك انسان مثقف مهذب بيحترم النقد ومتواضع بدليل انه بيزور مدونتى المتواضعة وكمان اجمل شئ انه مبخلش على جمهوره بعلمه وثقافته وتجاربه بالعكس انشئ هذه المدونة وبامكان اى حد زيارتها وبالمجان دكتور ياسر قام بتحليل ونقد بعض الكتب والقصص الصادرة لكاتبات عربيات تحت اسم مروج الذهب واحييه عليها وعلى فكرة انا مش بحب القراءة ومش من اهتماماتى وبحس بصداع لو قريت كتير بس مع دكتور ياسروكتابته الوضع مختلف وانتهز هذه الفرصة وبشكره بس لى عتاب انه ضيع على يوم اجازتى بس مش مهم فداك مية يوم وصباحك سكر