عيد سعيد

اهلا اهلا بالعيد

مرحبا مرحبا بالعيد

اد ايه كلنا بنحب الاغنية ديه مش عارفة ايه السر ان مفيش اى اغانى غيرها للعيد

معلقة مع الناس مع ان صفاء ابوالسعود مش مطربة اساسا وطبعا يا ليلة العيد

موضوع تانى متهيالى مينفعش العيد من غيرها انا عندى طقوس خاصة مينفعش

العيد من غيرها اولا لازم وحتما ولابد البس لبس جديد فى العيد زمان كان كل يوم

طقم جديد بعدها بشوية ممكن طقمين بعدها بكام سنة هو طقم واحد من سنتين تلاتة

ممكن اكتفى باى حاجة جديدة بودى او بنطلون او حتى شوز مش عارفة بعد كده

حيتقلص لايه بس لازم البس حاجة جديدة وخلاص واشتريها يوم الوقفة بالذات ويمكن

ده السبب انى اختصرت المواضيع فى حاجة واحدة عشان بتخنق من الزحمة اوى بس

نزول يوم الوقفة الوضع مختلف ناس واطفال وعواجيز بيكون الاحساس اجمل بكتير

الكل بيكون سعيد اساسى عندى الكحك يوم الوقفة برضه اشتريه وطبعا لما اروح اكله

لانى بموت فيه البالونات لازم تملى الشقة والورود فى كل ركن فى البيت عادة جميلة عودنى عليها بابا الله يرحمه وطبعا

الكوافير اساسى حتى لو كنت لسه عاملة شعرى قبله بيومين بس كوفرت العيد ليها معنى

مختلف اممممممممم ايه تانى يا ريم اه بمسك التيلفون واعيد على كل صحباتى وخالاتى

وعماتى وجداتى وجيرانى والبواب معندناش بس السكيورتى شاغل وغالبا يوم الوقفة

مش بنام لانى عادة برجع متاخر بعد رحلة الشراء والكوافير برجع اكل الكحك والغريبة

واستنى صلاة العيد من فترة قليلة بس ابتديت اصليها والحمد لله ليها احساس شكل تانى

يعنى لو مسمعتهاش ولا صلاتها مش بحس بطعم العيد ومن العادات الجميلة بتاعة المصريين زيارة

المقابر فى العيد اول ما بابا مات كنا حريصين علموضوع ده انا ومامتى واختى والصراحة

محبتهوش خالص فبأجل الزيارة ديه لبعد العيد الايام الاخرناية فى رمضان جميلة ومليئة

بالروحانية ومتهيالى انها هى ديه العيد الحقيقى امممممممممم نسيت ااقول ان العيدية ديه شئ

اساسى عندى حتى لو كانت ربع جنية ومش بصرفها بحوشها لحد متزنق خالص ممكن افكر

اصرفها بس لما تكون ورقها جديد بستخسر اصرفها وبشيلها فى المحفظة تفائلا بيها

كل سنة وانا وانتم والمدونون والمسلمون كلهم طيبين ويارب عيد فطر سعيد

وينعاد علي وعليكم بكل خير وكلوا كحك وعيشوا حياتكم بس بلاش بمب وصواريخ

لانها مزعجة ومؤذيه

لا استنوا مينفعش المرة ديه اى تعليق من غير عيديه يعنى متنفضوش كله يشخلل جيبه

اللهم ما انى صائم

فى ناس بتكون سريعة الاستفزاز والغضب زى انا بالظبط

وانهارده يمكن اكتر يوم استفزيت فيه وغالبا من ساعة منزلت من البيت وانا بقول

اللهم انى صائم الموقف الاولينى لم مش عارفة حتى ظريف كان معلق الاسانسير

فى الدور العاشر واضريت انزل على رجلى الحمد لله انه نزول مش طلوع

ونزلت اشوف السكعرتى انا بحب ادلعه فبيرد بمنتهى البرود ديه مشرفة

الباص بتجيب ولد من الدور العاشر والظاهر مستنيه لسه لما يصحى من النوم فخافت

لحد يسحب الاسانسير الموقف التانى لما السوبر فايزر بتاعنا يعملنا اجتماع قبل

الافطار بنصف ساعة عشان يقولنا ويسعدنا يبسطنا ان العيد ده مشاء الله الشغل

فيه على ودنه وعندنا وفود مهمة فلا للاجازات ومنعا التزويغ منعا باتا والا وقعتك سودة

البيه با طول ما هو قاعد قهوة ف قهوة ف قهوة معندوش مشكلة انا فيه ناس صايمة ونفسها

حتى تشم ريحة فنجان القهوة الموقف التالت لم اكون خلاص بركن ادام البيت والحمد لله

لقيت مكان بسهولة واضح ان ربنا كان حاسس انى قسيت كتير فى اليوم ده فحب يفرحنى

شوية والاقى مامتى بتتصل ريم هاتلنا اى عصير معاكى لحسن نسيت اعمل عصير

طب هو لازم عصير مينفعش ميه ولا بيبسى حتى نفسى اعرف مين اللى اخترع قمر الدين

عشان اخنقه طبعا مجبرة رحت السوبر ماركت الكاشير خلاص قفل عشان الاذان كان على

وشك وبعد متحايلت على المدير شوية ويرضيك بس مامتى تفطر من غير عصير حرام

ميصحش ده فى رمضان ضربلى العصير وخرجت الاقى حد جميل لطيف ابن ؟؟ ولا

بلاش اللهم انى صائم ركن ورايا علطول طبعا مستعجل عايز يشترى عصير يبل به ريقه

هو كمان بس طلع عنده دم وسايب فرامل اليد والسايس الله يكرمه زقها شوية عشان اعرف

اطلع مش عارفة الموقف رقم كام المهم جارتى الجميلة اللذيذة طلعت معايا فى الاسانسير

ريم لو سمحتى معلش البخور اللى بتشغليه رحته قوية اوى وانا عندى حساسية انا تنحت بجد

للمرة العشرين اللهم مانى صائمة يا طنط ازاى احنا ساكنين فى عشش فراخ وبعدين ريحة

البخور توصلك ازاى اصلا يعنى طبعا فى سرى بقول كده وبجد كان يوم مستفز اوى

خصوصا بقى بالليل وانا بفتح المسنجر الاقى صحبتى السعودية وهى بتتشات معايا

كاتبة على رسالتها الخاصة كل عام وانت بخير يا وطنى ولما سالتها قالت لى ايش

متعرفيش لازم اليوم الوطنى للسعوديه لازم اكتب كده المرة ديه مستفزتش اتغظت ليه

معرفش عشان نفسى نكون زيهم ونرجع نحب بلدنا زى الاول واضح ان كراهيتنا للحكومة

كرهتنا فى البلد فى فرق والله

الحمد الله انه عدا على خير يمكن لو مكنتش صايمة كان حصلت حاجات غير كده

اولا مكنش حد حيترحم من لسانى من اول السكعورتى لحد جارتى شفتم بقى ميزة الصايم

انك تقعد تقول اللهم ما انى صايم وتجز على سنانك طول اليوم

الابتسامة

فى مقالة قريتها لدكتور فرنسى فى مجلة الصراحة عجبتنى وقلت اكتبهلم يمكن نستفيد

منها فى حاجة عنوانها كيف تكون سعيدا اولا الدكتور بيقول اول ماتصحى من النوم حاول

تبتسم وتتفاءل من وانت لسه فى السرير بتتمطع واللى بيقوم من النوم مكشر وموده مش

ولابد يحاول يفتكر احداث سعيدة ومبهجة مرت به فى اليوم الى قبله او اللى قبل اللى قبله

او حتى من سنة مش مشكلة او حتى يفتكر رائحة فنجان القهوة اللى مستنيه عشان يشربها استدعاء الروائح المنبهة قادرة على التنبيه والنشاط

تقوم حضرتك من النوم تتوجه مباشرة ناحية الشباك تفتحه

وتحاول تستنشق الاكسجين النقى وانت برضه مبتسم طيب اذا الجو حر ومفيش اصلا

هوا عادى مجرد انك ترى نور الصباح ده يحفز شعورك بالنشاط بعد كده تدخل علحمام

تغسل وشك وتبص فى المراية وانت برضه مبتسم وراضى عن نفسك تغسل سنانك جيد جدا

بالمعجون لان ده حيخليك تنشط اكتر وتشعر بالانتعاش بعد كده تقف تحت الدش وتحاول

انك تسخن الميه اوى وبعدين تبردها اوى كام مرة ورا بعد بسرعة جدا لان ده بيساعد على

نشاط الدورة الدموية وبيزيل شعورك بالخمول والكسل بعد كده يا جميل تدخل المطبخ

وتصنع مشروبك المفضل من القهوة نسكافيه شاى بلبن عصير برتقال الى نفسك فيه المهم

انك قبل ما تشرب تغمض عينيك وتحاول تستنشق رائحة الدخان المصحوب برائحة

المشروب تقريبا اى حد بيشرب قهوة لازم يعمل كده مش عارفة انا بشرب شاى بلبن اول

ما ااقوم من النوم ايه النظام اشمه برضه ولا ايه المهم ان الموضوع ده بينشط الحواس

وينبهها حضرتك بعد كده مفيش قت لازم تلبس هدومك تفتح دولابك والابتسامة لا تفارق

وجهك وتزيل عن نفسك اى شعور بالسخط او ناحية ملابس القديمة او التى لبستها كتير

وتحسس نفسك ان مثلا الفستان ده تصميم ارمانى او البدلة ديه من ايف سان لوران عادى

تنظر لنفسك بزهو وفخر فى المراية وتبتسم ابتسامة جميلة وانت متفاءل ان ستقضى يوم

جيد اول ما تقفل باب الشقة لو قابلت جارك الحشرى الرخم مش مشكلة ولا يهمك اابتسم

وابدا انت بتحية الصباح لو حتركب عربيتك المتهالكة المتواضعة افتخر واحمد ربنا انك

عندك عربية فى غيرك بيتشعبط فى الاتوبيس انما اذا كنت بتتشعبط فى الاتوبيس ابتسم

واحمد ربنا انك تملك ارجل تقودك الى عملك لما توصل الشغل ابتسم فى وجوه زملائك

واشترك معهم بالحديث وحاول ان تختلط بهم وتثنى على اعمالهم ملابسهم يعنى ممكن تقول

لزميلتك ايه الجمال ده ايه الشياكة ديه مش حتخسر حاجة بالعكس حتتحول لانسان محبوب

ومبتسم ومتفاءل وبيختم الدكتور كلامه بان الانسان هو وحده القادر على جعل يومه سعيد

او لا فبالابتسامة التى تبتدى بها يومك يكون لها مفعول السحر على زملائك والمحيطين بك

والرضا والقناعة بانك تملك ما لا يستطيع غيرك ان يملكه يجعلك تثق وتفتخر بنفسك ,كلا م

جميل طبعا الابتسامة اجمل شئ فى الوجود بس بليز قبل ما نبتسم نستعمل معجون الاسنان

ومزيلات رائحة الفم الكريهة من بخاخات او هولز او تشكلتس منتول حتى عشان الابتسامة

متتحولش حاجة تانية اضافة حضفيها من عندى صلاة الصبح قبل النزول من البيت ولو

تقدر تقرا او تسمع قران برضه لها تاثير جامد جدا على حالتك النفسية وتهدءيتها

عانس

البنت فعلا فى سن الصغير من 20 لخمسة وعشرين بتقعد وتحط رجل على رجل وتتشرط

ومن خمسة وعشرين لحد 29 الوضع بيختلف شوية نظرتها بتختلف بيتحس ان خلاص لازم

لازم توافق على العريس المناسب وبتتغاضى عن كتير اوى من متطلبات البيت السعيد

لما توصل ال30 الوضع بيختلف تماما خصوصا لما البنات الى فى سنها بيكونوا اتجوزوا

وقريباتها او جيرانها فى العمارة

وقتها ممكن توافق على اى حد ممكن يتقدم لها مهما كان فى سبيل

انها تهرب من لقب عانس او نظرات الناس ليها والسؤال

البايخ هو الجميل متجوزش ليه لحد دلوقتى وهو الرجالة

اتعموا فى عينيهم لى اصحاب كتير وزملاء

فى الشغل فوق الثلاثتين ولسه متجوزوش

فى منهم اللى عايش حياته عادى ومش همه

وكتير منهم مخنوقة ومضايقة خصوصا لما

مش بتشتغل وقاعدة فى البيت مستنية ابن الحلال

فى امهات بجد بيزودوا الموضوع ده على بناتهم

وتفضل الام تذن على ودن بنتها كل اللى ادك

اتجوز وانتى خايبة ليه وله اى حظك المنيل ده

البنت بتتخنق واول عريس يتقدم لها حتى لو مكنش

مناسب بتوافق على طول وطبعا عشان العريس مش

مناسب نادرا لما الجوازة بتستمر والبنت تطلق

وترجع بيت اهلها وهى ملقبة بالمطلقة وفى المجتمع

بتاعنا ده لقب عانس ارحم بكتير من مطلقة

فياريت كل ام او اب او حتى صديقة

متعدش تذن على ودنها يالا اتجوزى

وفقى لحد امتى حتقولى لا ويسايبوا كل حد فى حاله

عندى بنت صاحبتى عمرها 26 سنة مامتها كل

ما تتخانق معها تقولها يا معنسة وعمرك ما حتتجوزى

وحصلت مرة خناقة ادامى ومامتها قالت الكلمتين دول

ولما سالتها ليه يا طنط بتقولى كده

ردت قالت هو كده البنت لو اتخرجت من الجامعة ولسه متجوزتش

ولا اتخطبت بتكون عانس وعمرها ما حتجوز تخيلوا وبتشتغل مديرة

مدرسة هى ديه المأساة اللى بتعيشها اى بنت بعد الخمسة وعشرين سنة

اكيد اى بنت بتكون نفسها فى بيت واطفال خصوصا وهى لسه فى منتصف العشرينات

وعز انوثتها بس ده مش معناه ان لو مالقيتش الانسان المناسب توافق على

اى حد وخلاص عشان متلقبش بلقب عانس

مأكولات رمضانية

انهارده وبما انى اجازة فانا اللى حضرت الاكل بتاع الفطار والحمد الله طلع يجنن يعنى ماما وطنطو اكلوا اصابعهم وراه

اول صنف واهم صنف الارز بالخلطة او بالمكسرات اللى اكيد كلنا بنحبه سهل وبسيط وحقولكم طريقته

المقادير كالاتى كيلو ارز 2 س ملعقة زبدة 2 ملعقة زيت مرقة دجاج او لحمة ولا مفيش عادى مية 2 ملعقة سكر كمية من الزبيب واللوز او بندق

الطريقة ; نغسل الرز اوى ونصفيه كويس جدا

نضع الزبدة والزيت فى الاناء الحلة يعنى ومعلقتين السكر ونتركه لحد ما يتحول لونه للبنى

نضيف الارز ونقلب

نضيف ملعقة بهارات وملعقة قرفة وملعقة فلفل اسود اكيد اصغر ملعقة وملح طبعاونقلب المكونات كلها مع بعض

نضع اكوب مرقة واتنين كوب ماء ونتركه لحد ما يغلى وبعدين نسيبه على نار هادئة لحد ما يستوى

نحمر الزبيب فى كمية من الزيت نحمص اللوز والبندق فى الفرن

نقوم بغرف الارز فى سرفيس ونضع على الوش المكسرات وبالهناء والشفاء

تانى طبق وهو كان كوردون بلو

لحمة او فراخ الطريقة واحدة لو فراخ حتكون صدورفليه مخليه ولو لحمة حتكون بيفتيك

المقادير 1 كيلو بيفتيك ملح فلفل 2 بيضة بقسماط مطحون دقيق زيت للتحمير جبن بالنسبة للحشو ممكن كل واحد على مزاجه يعنى ممكن جبن شيدر او رومى او موتزريلا مبشور طبعا وممكن زيتون حلقات او هوت دوج او حتى جبنة نستو

الطريقة نتبل البيفتيك بعصير الليمون ورشة فلفل اسود وبهارات وملح وفنجان صغير من اللبن عشان اللحمة تكون طرية

ونتركه ساعةفى التتبيلة

نجيب شريحة البيفتيك ونحشيها وبعدين نقفلها على بعض زى السندوتش كده ونغمسها فى دقيق وبعدين فى البيض وبعدين فى البقسماط

نعمل كده فى شريحة شريحة وبعدين نحطه لمده نصف ساعة فى الفريز

نسخن الزيت الغزير جدا ونقلى الكوردون بلو لحد ما لونه يكون ذهبى ومقرمش وجميل وبون بوتي

تالت طبق ده بيكاتا بصوص الكريمة والمشرم والحلو قطايف محشية بالبلح بس ماما اللى عملت الحلو بكرة الطريقة يا حلوين ايوه نسيت الشوربة كريم دى فالى بكرة برضه الطريقة

شيريهان

اكيد كلنا بنحب شريهان والفوازير بتاعتها كانت ليها معنى تانى استمرت تقدمها لمدة عشر سنين وكل الناس بمختلف الاشكال

والاعمار كانت بتحبها بالرغم من ان سنى كان صغير اوى ايامها بس حبيتها ولما كانت بتعاد فى السنين اللى بعد كده

كنت بشوفها شريهان رشيقة جدا وجميلة الجمال العربى الشرقى بتاعنا وعنددها فتنس جامدة جدا فى حركاتها ورقصاتها

فى الثمانينات مكنش فى ستلايت لسه ولا فضائيات ولا فيديو كليبات ولا مغنيات لبنانيات كانت كل حاجة طبيعية وبالرغم من كده كان فى نقد بيتوجه لشريهان انها متكلفة اوى فى حركاتها وبهرجة الفساتين اللى كانت بتكلف خزينة التلفزيون فلوس كتير اوى ومالوش لازمة كل ده متهيالى ان من بعد شيريهان متعملتش فوازير ولا نيللى كريم ولا دينا ولا حتى حليمة عارفين حلمية اللى حاولت تقلدها بس فشلت فشل ذريع مفيش حد فيهم عنده حضورها ولا لياقتها ولا حتى خفة دمها

جمالها كان طبيعى يعنى ولا نفخ ولا شد ولا نحت حتى شعرها طبيعى مش تركيب وبالرغم من كل ده شيريهان عاشت

حياة فنية قصيرة جدا بسبب المشاكل

اللى صدفتها بحياتها والحواداث اللى اتعرضت ليها والاشاعات كانت ممكن تكون فنانة عالمية شيريهان حاربت عشان

تثبت نسبها فى قضية كانت صعبة جدا وكسبتها التحقت بكلية الحقوق واتخرجت بس نقابة المحامين مرتدش تسجلها

اتجوزت علال الفاسى المليونير السعودى وانفصلت عنه سريعا وبعدين عاشت حياة صعبة بعد ما حصلها كسر

بالعمود الفقرى وسمعنا انه كان من حادثة وناس قالت حد كبير اوى فى البلد حاول يموتها وحد تانى قال مراة رجل اعمال

حسام ابو الفتوح خلت ناس ترميها من البلكونة عشان كان فى علاقة بينها وبين زوجها مش مهم ايه الحقيقى المهم ان

الاصابة ديه كانت كفيلة انها تقضى على فنانة استعراضية من الدرجة الاولى ومنعتها من ممارسة التمثيل والرقص

بعد كده ارتبطت بالزواج من المليونير علاء الخواجة وهو زوج اسعاد يونس يعنى شيرى وسعاد ضرر وانجبت بنت

منه زى القمر اسمها لؤة لؤة ولم يمهلها القدر ان تستمتع بحياتها واصابت بسرطان الغدد اللعابية وهو واحد فى المليون

مرض نادر جدا ياااااااااااااااااااا بجد ماساة بالرغم من الشهرة والاضواء والفلوس بس الصحة اهم من كل ده شيريهان

تعيسة جدا وبيقولوا ان الايام ديه رجعت حالتها تدهورت تانى وسافرت لباريس لتستكمل العلاج اللى كانت وقفته لفترة

بجد ربنا يشفيها ويريحها من المرض الفظيع ده خصوصا انها التزمت جدا من فترة من الزمن ياريت كلنا ندعى لها

فى الشهر الكريم ده لانها بجد اكيد اسعدتنا كلنا لما كنا بنتفرج على فوازيرها

the moment of truth

البرنامج الامريكى الاكثر شهرة حاليا the moment of truth فكرة البرنامج عبارة عن المتسابق ومعه اسرته

واصدقائه المقربون جدا له والمذيع بيساله 21 سؤال كل وطبعا الاسئلة مقسمة من الاسهل لاصعب المهم البرنامج والضيف بيتحط

تحت جهاز كشف الكذب اللى بيكشف اذا كان المتسابق كذاب او لا اسئلة البرنامج جريئة جدا جدا وبيترد عليها بنعم او لا بس واسئلة عن مراحل

المختلفة لحياة المتسابق وطبعا المتسابق بيعرى نفسه تماما ادام الدنيا كلها ومش همه اى حاجة ولا اى حد بس عشان

يوصل للجائزة بتاعة البرنامج وهى نصف مليون دولار ححكى عن حلقة كانت من ضمن الحلقات اللى شفتها وكانت

المتسابقة صريحة جدا ومصرة انها توصل للجائزة الكبرى رغم انف الجميع كان بيحضر مع المتسابقة ديه مامتها

وحماتها وجوزها وصديقتها المقربة طبعا سالها المذيع اسئلة كتير جدا ولكن اليكم الصراحة الى حد الفجر للمتسابقة

المذيع هل تحبين زوجك ردت لا المذيع هل قمتى بخيانة زوجك مع رجل اخر ردت نعم وهنا احمر وجه الزوج وكانت

الدموع واضحة جدا فى عينيه سالها بتحبى حماتك اجابت لا سالها احيانا بتحسى ان حماتك متطفلة وغير مرغوب فيها

اجابت نعم واتجهت الكاميرا ناحية الحماة اللى كانت بتبص فى الارض من الكسوف سالها تتمنى عندما تكبرى ان تكونى تصبحى

مثل امك ردت لا سالها كذبتى على امك قبل كده ردت نعم كثيرا خصوصا انها كانت حريصة على انى احتفظ بعذريتى

وانا فقدتها فى الخامسة عشر من عمرى ولم اقوم باخبارها وعندما اتجهت الكاميرا للام كانت تبكى سالها هل تثقين

بصديقتك هذه ردت نعم سالها اتثقين بها لدرجة انك ممكن تتركيها مع زوجك وتخرجى ردت لا لا اثق فيها لهذه الدرجة

وطبعا كانت صاحبتها فى موقف لا تحسد عليه وباين على وشها اوى المهم ان المتسابقة ديه كانت حريصة جدا على انها تعرى نفسها لدرجة

انها وصلت للسؤال القبل النهائى وكل اجابة كان جهاز كشف الصدق بيردد بعدها كلمة حقيقى ليؤكد صدقها وعشان

توصل للسؤال اللى وراه ولما سالها المذيع هل انتى انسانة مؤمنة اجابت نعم وكانت الاجابة غلط وكشف الجهاز كدبها

وشرح المذيع انها كانت بتمارس علاقة مع رجل اخر غير زوجها وهى اعترفت بذلك غير انها كانت تقوم بالسرقة من

احد المتاجر فاذن كيف هى مؤمنة وطبعا لم سمعت الجهاز بيقول كذب اتجننت وقعدت تصوت لانها كانت خلاص قربت

توصل ومتهيالى انها غبية اوى ازاى شايفة نفسها مؤمنة بعد ده كله كشفت نفسها على الاخر ادام الناس كلها وفى الاخر

خسرت مش الفلوس بس احترام الناس ليها البرنامج ده اثار نقد كتير اوى لانه زى ما بيقولوا خرب بيوت كتير بسبب

صراحة الزوج او الزوجة وواضح ان المتسابق اللى بيقدم فى البرنامج ده بيكون بايع كل حاجة ومش مهم بالنسبة له اى

حاجة غير انه يكون من اصحاب الملايين ياترى الملايين تستاهل كل ده ؟؟نجئ لموضوعنا المهم بيقولوا خير اللهم ما

جعله خير انهم حيعربوا البرنامج يعنى حيعملوه فى الدول العربية زى الخاسر الاكبر ومن سيكسب المليون والبرامج

الكتير اللى بتتعرب ديه بس ياترى البرنامج ده ينفع يكون عربى فى المجتمع العربى متهيالى لو الست ديه عربية مثلا كنا

حنشوف حماتها قلعت الشوز وحدفتها بيها وامها رقعت بالصوت خسارة تعبى فيكى وطبعا جوزها كان قام جبها من شعرها

وهو بييصوت ويقول خينة خينة طب ازاى اصلا البرنامج ده فكرته عن الصراحة الى ابعد الحدود ممكن رجل حنتلمان

مثلا يقول ايوه انا كنت بدخل واسرق من السوبر ماركت كان حيكون حديث الصحف وضيف العاشرة مساء والبيت بيتك

و90 دقيقة يا عالم مش كل حاجة امريكية ممكن تكون عربية ارحموا فى فرق كبير اوى بيننا وبينهم ولو اتعمل مع مراعاة

فروق العادات والتقاليد فى الاسئلة حيفقد جماله والفكرة القائمة عليه ومش حيكون له لازمة

تعليقات مفبركة

دخلت مدونة حد من اصحابى عشان ابعتله تعليق على بوست كان كاتبه والحقيقة فوجئت ان البوست عليه 250 تعليق تخيلوا الله ما لا حسد الممهم الحقيقة انا مكنتش بقرا البوست بتركيز اوى فقلت يمكن البوست ده جامد وانه بس

ماخدتش بالى فقلت استنى واقره بعد الفطار مع فنجان قهوة وكلى اذان صاغية وعيون مفتوحة على الاخر يمكن وللاسف

لقيت البوست يعنى عادى مش مكسر الدنيا ولا حاجة المهم قريت تعليقات ويا سلام على النفاق حتى واحنا فى رمضان

تسلم ايديكى وعنيكى ورجيلكى وابدعتى واخرقتى واعجزتى ومش ممكن ومش معقولة وربنا يزيدك مش قادرة افهم ليه

كل ده واكتشفت ان المدونيين المصريين مش بيفصلوا بين عاداتهم وتقاليدهم ومدوناتهم ازاى يعنى لما حد يزورنى

ويعبرنى انا كمان لازم ارد له الزيارة وعيب ادخل وايدى فاضية لازم يكون معايا كيس برتقال ولا علبة شكولاتة

وكلمتين حلوين وجامدين عشان يتردولى قريب اوى واراهن ان نصفهم مش بيكون تعب نفسه وقرا البوست او يمكن

اول سطرين ومن النص كام سطر واخر سطر سبحان الله كرماء احنا حتى فى تعليقاتنا طبعا على ما وصلت لاخر

الصفحة واالله نسيت التعليق ونسيت البوست اصلا كان بيتكلم عن ايه كنت متابعة مدونات اجنبية غربية افرنجية يعنى

عشان اعرف الناس افكارها زينا كده يعنى نص المدونات شعر ونعى حظ وحزن ونكد او قصص وافلام وجزء اول وجزء تانى وتابعونا والى لقاء قريب والنص التانى تهريج وسب فى البلد والحكومة

والحاجات ديه طبعا لاقيت حاجة تانية خالص المدونيين الغربيين غالبا بيهتموا بحياتهم الشخصية واطفالهم وصورهم

وقليل اوى السياسة وممكن وصفات للاكل او ملابس الدنيا عندهم بسيطة جدا زى حياتهم اكتر مدونة بيكون عليها تعليقات

مش بيزيد عن 15 تعليق ويمكن صادفتها مرة واحدة دخلت مدونات كتير 0 تعليق تخيلوا ولا بوست عليه تعليق ومستمر

ومش همه ومش بيحاول يفرض نفسه على حد وزرنى وازورك والنبى متنساش معاك كام كلمة حلوة وانت جى ياريت

محدش يزعل منى ويفتكر انى بتكلم عليه لانى انا نفسى بعمل كده وحصلت مشكلة بينى وبين حد كنت بعتز برايه بسبب

الموضوع ده بس ديه ظاهرة عندنا فى مجتمع التدوين المصرى والمصرى فقط مش والعربى لانى زرت مدونات عربية

كتير ومفيهاش كده شفتم اد ايه احنا شعب عاطفى ومش قادرين نفصل حتى فى عالم التدوين بين المشاعرو كرم الضيافة

امبارح انا دخلت مدونة اسمها جذبنى سينيوية وافتخر تقريبا مش متاكدة وكانت كاتبة بوست عن ان المذيع كان بيعمل

حوار مع بنتين فى خيمة رمضانية وسالهم بتعملوا ايه فردت واحدة انا بصحى من النوم اصلى وااقرا قران فبتقول

انها سخرت منهم تخيلوا طيب بتسخرى منهم ليه وانتى مالك هو انتى ربنا كل واحد حر يلبس اللى يلبسه ويقلع اللى يقلعه

وبتتفرجى ليه اصلا على تلفزيون فى رمضان ماشى ما علينا بتتكلم على اليسا اولا مسمياها ابليسا تخيلوا وبتقول انها

فى لقاء معاها قالت ان ربنا بيقف جنبها دايما وطبعا مش عجبها كلام ابليسا لان ازاى ربنا يقف معاها نفسى كل واحد

خليه فى نفسه لان علاقة العبد بربه علاقة خاصة جداااااا وممكن فعلا ربنا بيكون بيقف معاها وبيساعدها عشان تتعظ

مثلا يا جماعة الذات الالهية ديه واسرارها محدش ممكن يفهمها ويعرفها مش بالحجاب ولا بالنقاب ولا باللحية

باللى جوا بالنية والايمان الداخلى وقال ربنا فى كتابه الكريم لا يسخر قوم من قوم عسى ان يكون خير منهم ولا نساء من نساء عسى ان تكن خير منهن

فياريت متسخريش من حد تانى

ايطلى مود

انهارده كان عندى حنين لمود معين بحسه اوى لما بشوف البحرو قلع نعليى وامشى حافية على البحر واتمتع بزذاذ الموج يااااا احساس جميل او مثلا لما الجو يكون بارد ومطرة جامدة اوى مش بستخبى وقتها واقول الله مطرة واراقبها من وراء الزجاج لا بنزل الشارع واقف تحتها واستمتع بيها موت ويااااااا بأ على ريحة الجو بعد المطر حكاية وطبعا بما انى فى القاهرة المحروسة وصعب انى ازور اسكندرية فى الايام ديه وكمان ده مش وقت مطر خالص عملت حاجة ممكن تقربنى للمود ده وتخلينى اشعر انى شوية مبسوطة اشتريت سى

دى لفيلم رومانسى لممثلة انا بحبها اوى وقلت بعد الفطار والذى منه اعيش معاه شوية شغلت

حضرت مشروبى المفضل من الهوت شكولات واحلى كاكاو على فكرة كادبورى طعمه حكاية وولعت كام شمعة كده لانى بموت فى الشمع وشغلت الفيلم بجد فيلم تحفة بيحكى عن

كاتبة اطلقت من جوزها بعد ما اكتشفت انه خانها وبعد ما كانت عايشة فى قصر معاه

استاجرت شقة متواضعة عشان تعيش فيها وقررت تزور ايطاليا سياحة عشان تغير

المود الى عايشاه وتقدر تكتب من جديد هناك عجبتها بلد على البحر صغيرة وجميلة

وقررت انها تشترى بيت وتعيش هناك اشتريت بيت اثرى وضبته وكونت صداقات جديدة

مع ناس جديدة ونفسها اتفتحت على الحياة مرة تانى وقابلت هناك شاب ايطالى وسيم

هو وسيم اوى علفكرة مش عارفة ليه اطلينة حلوين اوى كده عشان احفاد الاغريق مثلا

عادى ما احنا كمان احفاد الفراعنة طب سؤال ايه الفرق بين احفاد الاغريق واحفاد

الفراعنة ؟ الفيلم كل متصور على البحر وملئ بالرومانسية والمناظر الطبيعية الخلابة

شوية الواحد غير مود وبجد اد ايه الافلام لما تكون حلوة بتدى احساس بالسعادة والتفائل

والجميل اكتر فى الفيلم ان البطلة مبتعرفش ولا كلمة ايطالى وبالرغم من كده كانت علاقتها قوية جدا بالشاب الايطالى عشان كانت بتجمعهم لغة واحد مفهومة وسهلة جدا لغة الحب

بجد نفسى اسافر ايطاليامن زمان وبعد ما شفت الفيلم ده كبرت فى دماغى اكتر

احلى لقمة قاضى

يمكن بقالى اكتر من ساعة جالسة بفكر فى موضوع كده وشيفاه انه غريب شوية ان حد ممكن

تكون كانت بتربطك بيه علاقة قوية جدا بس انتهت وتفير ايه كان السبب وكان الشخص

اللى بتربطك بيه العلاقة ديه غالى عليك او يمكن حياة او موت بالنسبة لك

وجوده وانك تسمع صوته وتشوفه ده بالنسبة اجمل شئ فى الدنيا وبعد مرور وقت الصدفة

تجمعك بيه فى حفلة او عيد ميلاد او حتى فى السوبر ماركت وكل اللى بيحصل انك بتبصله

اوى وهو يبادلك النظرات وخلاص على كده وكل الى تفكر فيه وقتها ياااااه ده اتغير اوى

ايه ده ده بقى ااقرع وبكرش مش ممكن وكبر كده ليه ولا مثلا ايه ده ديه بقيت عجلة ومالها

مش مهتمة بنفسها كده ليه او خست ووحشت اوى كويس انى متجوزتهاش بس كل ده اللى

احنا ممكن نفكر فيه وقتها انما اى ذكرى حلوة او ان ازاى الانسان ده كان بيحبنى ويخاف على

بيتنسى زى ما اى حاجة بتتنسى كل يذهب ادراج الرياح قصة ان الحب الاول والحب

الحقيقى عمره مابيتنسى ديه كدب علفكرة والله كل حاجة بتتنسى مع الوقت حتى الذكرى

الحلوة وقت مبنعيش الحب بنكون مغمضيين عن اى حاجة وحشة فى الحبيب بس سبحان الله

بعد ما العلاقة ديه بتنتهى كله بيطلع فى الغسيل ويااااه كان بخيل اوى وايه ده دى كانت

انانية موت ودمها تقيل كمان وذوقها فى اللبس بلدى فحت المهم الحوار الكئيب ده عشان

اتسحرت فى خيمة وقابلت حد كنت بحبه كده يجى من مليون سنة وكان هو وعائلته الكريمة

واضح انه اتجوز من فترة عموما هو كان اكبر منى بكتير واكتفينا اننا بصينا لبعض كده من

بعيد لبعيد بالرغم ان هو ده نفس الشخص اللى من حوالى ست سنين كان ممكن اول ماشوفه

بجرى عليه وكلى فرحة ولهفة ليه المهم فى الموضوع هى لقمة القاضى اللى هى الزلابية

بموت فيها بالسكر وعليها رشة قرفة بجد تجنن وخصوصا الرجل اللى بيعملها وطريقة

تكوريها ورميها فى الزيت ولما يطلعها من الزيت ويقعد ينطط فيها شوية بجد جامدة اخر

حاجة عم سيد كان مستغرب لما لاقنى واقفة جنبه بتفرج عليه واستغرب اكتر بقى لما

لاقنى بصوره وابتسم لى ابتسامة واسعة جدا واضح ان فاهم غلط ولا حاجة

كراهية

ايه كم الكراهية اللى مستوحشة ديه عند البنى ادميين صاحبة ماما وبنتها فطروا معانا وبعدين قمنا نزلنا عشان نصلى التروايح شئ جميل خصوصا انى مصدقت لاقيت حد يشجعنى رحنا مسجد مصطفى محمود لانه جنبنا وكمان من احسن المساجد اللى فى المنطقة وغالبا الكل بيصلى فيه المهم الزحام هناك فظيع بس مش مشكلة احسن الجو الروحانى بيكون اجمد

انما الستات اللى جوا المسجد حدث ولا حرج مش عارفة مالهم بيحجزوا الصفوف الاولى مثلا كانهم فى سينما او مسرح وجايين شلل مثلا او اصحاب ولازم يقفوا جنب بعض كلهم ممكن خايفين ليتهوا ولا حاجة الموبيلات شغالة وكل واحدة الجرس يرن اغنية شكل ووحدة جايبة معاها ترمس شاى والتانية عصير وعايشين حياتهم اخر حاجة والنظرات المستفزة اللى جاية فى اى خناقة كان معانا طفل صغير عمره ثلاث سنوات ابن بنت صاحبة ماما اتفقنا اننا حنقف اخر صف والولد حبوب حيقعد مؤدب مش حيعمل حاجة تقريبا الولد اتخض من صوت النا س وهى بتامن ورا الشيخ فقعد يعيط ويصرخ وكانت كارثة المهم شوية هدئ فتقريبا شكل النساء جذبوا وهما راكعيين فقعد يجرى بين الصفوف واحدة من الستات اللى وشها عليه غضب ربنا وتقريبا نازلة عايزة تتخانق مع اى حد بظهر ايديها وبكل قوتها والولد ماشى من ادامها طيرته طبعا الولد وقع على ضهره واتخض وقعد يعيط مامته وجدته شافوا المنظر ده فقامت خناقة من العيار التقيل لان الست ديه بجد بشعة طبعا مش حقول الكلام اللى اتقال بس ابسط حاجة فيه ايه يا ختى لما انتى معاكى عيل شيطان زى ده جى بيه الجامع ليه متقعدى فى بيتك ولا تسيبيه مع ابوه تخيلوا ومش قادرة ااقول لكم على صوتها اللى اتخن من صوت اتخن راجل طبعا الناس قعدت تهدى وعيب وميصحش وحاجات كده البنت انهارت وخرجنا من المسجد طبعا قعدنا فى العربية بتاع ساعة عشان كان فى حد ظريف راكن ورانا وشداد فرامل اليد يعنى غلاسة عشان منطلعش تخيلوا اللى بيحصل فى الجوامع المفروض الواحد لما يروح يصلى يكون مبتسم ومتاسمح حتى عشان صلاته تتقبل مش عارفة الناس جرى لها ايه بقيت تكره بعضها كده ليه انا طبعا مش مع الاطفال فى المساجد لانهم ساعات بيضايقوا الواحد ويلهوا عن الصلاة بس مش لدرجة اننا نضربهم كان ممكن تنبه مامته باسلوب لطيف بس ازاى وهى اصلا مش لطيفة خالص قررت بعد كده اصلى فى البيت او فى جامع يكون فاضى ومش معروف

,الان الى كل ما يهمه الامر بعيدا عن الشائعات المغرضة http://www.akhbarelyom.org.eg/akhbarelyom/issues/3331/0101.html

العك التلفزيونى

حاولت اتابع المسلسلات يمكن الاقى مسلسل يشدنى ووتجبرنى احداثه انى اتابعه بالرغم من صعوبة انى اتابع مسلسل على 30 يوم خصوصا لما احداثه المفروض تخلص 15 يوم المهم قعدت ادام التلفزيون ااقلب فى القنوات وركزت على الممثلين اللى اتفرضوا علينا فى كل رمضان يعنى زى الياميش وفانوس رمضان يسرا طبعا زى كل سنة تبحث عن المبادئ والشرف ومفيش جديد بتقدمه الهام شاهين ومصطفى فهمى زواج سعيد ثم خيانة زوجية وزوجة تانية ودمار مفيش جديد يحيى الفخرانى المواطن الشريف الذى يبحث عن خبز يومه الدالى لا احداث جديدة المعلمة فيفى عبده زى كل سنة فيلم عربى بس السنة ديه مزودة الردح شوية تقريبا من خلال 30 مسلسل شفت من كل واحد شوية لقطات فهمت وعرفت انى مش حتابع حاجة السنة ديه لان المواضيع مستهلكة والممثلين كمان رجال اعمال وشر وخير وموت وقتل لا جديد وقصور وعربيات اخر موديل وحوارى وناس عايشة تحت خط الفقر نفسى اعرف الطبقة المتوسطة نصف الشعب المصرى تقريبا اللى عايشة مثلا نقول حياة كريمة مستورة ليه مش بنلاقيها فى المسلسلات ولا بيسلطوا عليها الضوء المهم كله عك ماما متابعة اسمهان لانها كانت بتحب اسمهان وناصر لانها كانت بتحبه انا الصراحة ماليش خلق للمسلسلات التاريخية والدينية مش طالباها خالص فاكرين مسلس ماما نونة بتاع السنة اللى فاتت شدنا كلنا وتابعناه وكان جميل عشان كانت قصته جديدة مش مواضيع بايتة ومملة المهم ان الممثلين بنشوفهم فى جميع المسلسلات اللى تلقيهم اخوات فى مسلسل فى مسلسل تانى بيحبوا بعض فى مسلسل تالت بيقتلوا بعض لدرجة ان تلاقى دماغك خلاص وكله دخل على كله ومش فاهم ده مع مين ولا فين ولا ازاى فنصيحتى محدش يتفرج على مسلسلات عربى







هشام طلعت مصطفى

من يومين وساعة الفطار تقريبا والمغرب بيقول الله اكبر وصلت لى رسالة على الموبيل من الاخبار ان هشام طلعت اتقبض عليه بجد اضايقت مش عارفة انا متعاطفة معاه وعندى احساس انه مظلوم ولو مثلا فكرنا شوية انه دفع 2 مليون دولار للرجل ده ايه اللى يخلى الرجل ده يجى على مصر ممكن يوفر له اى مكان فى العالم عشان يختبئ فيه وبعدين فلوس ايه اللى كانت سوزان لطشاها منه اذا كان دولابها فيه بس 15 مليون دولار وهو بنفسه مهدياها بحزام من الالماظ فى عيد ميلادها فى الاول الكل قال كوسة طبعا عشان هو صاحب جمال جدا ولما اتقبض عليه قالوا اتخلوا عنه عشان المكتوم بنفسه طلب من مبارك القبض عليه والتحقيق معاه وناس بتقول الموضوع ده من ساويرس او عز عشان يتخلصوا منه خصوصا ان قناة o t v بتاعة ساويرس طول النهار كانت بتذيع الخبر عموما الموضوع غامض جدا وفيه حلقة مفقودة محدش قادر يوصلها ممكن كام سؤال

1اللى قتل 1300 واحد اخد براءة ليه ؟
2-المتسبب فى حرق القطر مين هو؟
3-المسئولين عن حريق الشورى الصقوها فى ماس كهربى ليه ؟
4-ومستورد اكياس الدم الفاسدة اخد ليه براءة ؟
5-ومستورد المواد المسرطنة دلوقتى بينعم بفلوسنا والرطان متفشى فى الشعب المصرى ؟

وليه بالسرعة ديه هشام امام المحكمة مش معترضة على كده ولكن معترضه على الضغوضات اللى مصر تحتها ومن اجلها قدمت هشام للمحاكمة !!

Happy birthday my best friend

wishing you all the best in the year to come may your days be filled with sunshine and beatiful colors and may your nights be filled with comforting dreams and wishes to come

الى صديقتى الجميلة امممم طيب مش حقول اسماء احتراما للخصوصية واللى بعتز بصداقتها اوى وكنت اتمنى انى اعرفها من زمان يعنى يجى من مليون سنة كده زى ما منير بيقول انهارده عيد ميلادها كل سنة وانتى بالف صحة وسعادة يا قمر وعقبال مليون سنة بجد انتى انسانة طيبة اوى كفاية انك بتفضى نفسك وتسمعى مشاكلى وتدينى رايك اللى بعتز بيه وتنصحينى لوجه الله واتعلمت منك حاجات كتير فى وقت صغيرميرسيه ليكى يا جميل وتقبلى الهدية البسيطة ديه اغنية جامدة بيئة طحن اممممممممم يارب تعجبك عشان تشغليها انهارده فى عيد ميلادك

وداد

اخباركم ايه انهارده تانى يوم رمضان طبعا امبارح كلنا فطرنا وسط الاجواء العائلية الجميلة اللى مش بنلاقيها الا فى الشهر ده انا مثلا فطرت عند جدتى وكنا كلنا متجمعيين هناك الابهات والامهات والاحفاد واحفاد الاحفاد كده يعنى ومش بنتلم اللمة ديه الا فى المناسبات السعيدة زى الافراح اوالمناسبات الحزينة يعنى لو عزاء ولا حاجة وطبعا اول يوم رمضان ده اساسى اننا كلنا نتجمع ونتلم وبتكون مناسبة جميلة لاننا بجد بنكون متوحشين بعض اوى خصوصا لما يكون مكنش فى مناسبات مرت قريب مش حناقش ليه لانى متاكدة مش عليتنا احنا بس اكيد اغلب العائلات كده دلوقتى محدش بقى فاضى لحد اجمل حاجة الست الجميلة اللى بحبها اوى وتستاهل كل خير دادة وداد وهى فعلا اسم على مسمى ودودة وطيبة والابتسامة مش بتفارق وشها اللى ملامح الرضى ملياه الست ديه بتشتغل عند جدتى تقريبا من ربع قرن وكانت لسه صغيرة عروسة جديدة جت من الفلاحين على مصر على طول وبعدين اشتغلت عند جدتى وبالرغم من الظروف اللى بتمر بيها طبعا طول الخمسة وعشرين سنة هى المسئولة الوحيدة عن الاسرة لان جوزها مريض مش بيشتغل تحملت مسئولية زواج البنات والانفاق والتعليم على ابنها المهم الست ديه عانت كتير جدا بس والله دايما راضية ومبتسمة وسعيدة الساعة 8 بالظبط ترن الباب وتمشى الساعة 5 عمرها ما اتاخرت ولا غابت حتى ف عز الشتاء والبرد او المرض طول عمرها عاملة زى الساعة بقيت واحدة من العائلة وصعب ان احنا نزور جدتى ومتكنش موجودة بنحس ان فى حاجة ناقصة اول يوم رمضان استقبلتنا بابتسامتها الجميلة ورحنا على الفطار تقريبا كانت مجهزة كل حاجة وواقفة تلبى لكل واحدد طلباته اتحايلنا عليها عشان تقعد تاكل او تفطر قالت لما شفتكم شبعت سبحان الله فعلا اعطاها قناعة ورضا اى حد يحسدها عليه وغير كل ده لسه فاكرة كل واحد بيحب ايه وتعمل لكل واحد الصنف المخصوص اللى بيحبه يوم مكلمت جدتى عشان ااقول لها كل سنة وانتى طيبة رديت على وقالتلى ريم العكروتة هى دايما تقولى كده بكرة مش حعمل الكشك الى بتحبيه قالتها ييييييا يا دادة لسه فاكرة انا نفسى نسيت انى بحبه وكان اول صنف على السفرة ده غير طبعا ان اكلها ليه نكهة خاصة جدا يمكن عمرى ما اكلت اكل بالطعامة ديه مهما كلت فى احسن واجمل الاماكن حتى طبق الفول بتاعها مالوش حل بجد يا وداد بحبك اوى لما خالو سالها عاملة ايه فى الغلاء ده وقادرة تعيشى ازاى انتى واولادك ضحكت وابتسمت وقالت ربنا كبير فعلا الست ديه مثال للمرأة المصرية المكافحة واللى تستاهل كل خير كان نفسى تكون بتعرف تقرأ ولا تفهم فى النت عشان تقرأ اللى انا بكتبهوله ده وكل سنة وانتى طيبة وزوجك واولادك بخير وراضي وقنوعة دايما بالى قسمهولك ربنا