من كام يوم كده كنا جايبين انا وهيثم مجموعة من الافلام العربى الجديدة اللى نزلت الموسم ده وقلنا نتفرج عليها ونتسلى
شوية وكل منشغل سديهية والله بعد ربع ساعة نطلعها ونشغل التانية عملنا كده تقريبا فى خمس افلام مش فاكرة حتى
اسمياهم ايه وميشرفنيش انى افتكر وندمنا اشد لندم على الفلوس اللى ادفعت واترمت فى الارض اخر مزهقنا بنقلب
فى القنوات لاقينا فيلم على روتانا زمان اسمه بين الحياة والموت تقريبا انتاج الخمسينات الفيلم ده انا كنت بحبه جدا
لانه مرتبط بذكريات الطفولة لما كنت ارجع من المدرسة خصوصا يوم الخميس وبيكون فى فيلم عربى على القناة الثانية
الفيلم ده كان بيتعرض كتير بطولة عماد حمدى ومديحة يسرى والعبقرى يوسف وهبى مش عارفة حتفتكروه ولا
لا المهم عماد حمدى مريض وبنته بتشترى له دواء تركيب من الصيدلية والصيدلى لخبط نسب الدواء والراجل
ده حيموت لو خد الدواء وبعد ما البنت بتمشى الصيدلى بيكتشف الغلطة اللى ارتكبها وبيبتدى يبحث عن عنوان المريض
من خلال الروشتة بتاعة الدواء وصل للدكتور اللى كاتب الروشتة واتصل به واعطاه له العنوان راح للعنوان والبواب
قاله ان الرجل ده عزل من حوالى اسبوع المهم الصيدلى طلع على قسم البوليس وقابل الحكمدار اللى لعب دوره
يوسف وهبى وشرحله الموضوع الحكمدار بلغ الاذاعة اللى كانت بتذيع البيان التالى من حكمدار العاصمة الى المواطن
محمد ابراهيم الساكن فى مصر القديمة لا تشرب الدواء الذى بعثت ابنتك فى احضاره لان الدواء فيه سم قاتل
فيلم اكتر من رائع يشدك من اول دقيقة لاخر ثانية فيه كم كبير من المفارقات والحركات انا وهيثم استغربنا لحال الدنيا
زمان الناس كان عندها اخلاق واحساس الصيدلى مخفش واهتم بانه يوصل للرجل ده باى طريقة عشان ينقذ حياته
سبحان الله لسه كنت بقرا فى جريدة فجر عن الادوية المغشوشة وشركة الادوية اللى بتستورد مادة فاعلة من الصين
بنصف التمن عشان مغشوشة ومضروبة وتصنع منها الدواء ومش مهم كام واحد حيموت ولا يرو ح فى ستين داهية
وافتكرت المواد المسرطنة الى استوردها وزراة الزراعة عشان تدمر الشعب ويتفشى السرطان بين الاطفال والكبار
بشكل رهيب من غير ضمير ولا ذمة وافتكرت اكياس الدم الفاسدة وافتكرت حادثة العبارة وافتكرت حاجات كتيييييييييير
حصلت وبتحصل وحتحصل سبحان الله ايه اللى غير المواطن المصرى الشريف ده كله عشان الفلوس بجد ملعون ابو
الفلوس تصوروا يوسف وهبى قال ايه للصيدلى احنا 2 مليون تفتكر مصر فيها كام واحد اسمه محمد ابراهيم بس لازم
نلاقيه تفتكروا هو ده السبب اننا بقينا 80 مليون يعنى كترنا اوى ومبقاش لينا لازمة وحياتنا مالهاش اهمية والجنيه
اهم بكتير من روح بنى ادم ممكن يموت ولا الاخلاق هى اللى اتغيرت ولا ايه بالظبط عجبتنى اوى فى اخر الفيلم
كلمة قالها يوسف وهبى لمحمد ابراهيم اللى هو عماد حمدى بعد ما اخيرا وصلوله احنا اهم حاجة عندنا صحة المواطن
يااااااااااا تخيلوا معلش 60 سنة قلبوا الدنيا دلوقتى الحكومة بقيت اخر حاجة تهمها صحة المواطن حسبى الله ونعم الوكيل
هناك 17 تعليقًا:
ياااااااااااااااااااه
فعلا مفارقة غريبة
ومخدتش بالى منها قبل كده
فعلا
الاخلاق كانت عالية زمان
والضمير كان صاحي
والناس كانت بتخاف ربنا برغم ان التدين زمان مش ذي دلوقتي
بصراحة حاجة تحزن
اولاً صباح الخير
الفيلم "حياة أو موت" 1954 من إخراج كمال الشيخ ويعتبر من علامات السينما المصرية لأنه زي ما يقولتي بيكرس فكرة قيمة المواطن وأهمية وحقه في الحياة
وطبعا الفيلم ده كان نقله لأنه لم يعتمد على أي أغنية أو رقصة وده يعد ابتكار في زمنه وأول فيلم لكمال الشيخ "منزل رقم 13" كان بنفس الكيفية على عكس سينما الوقت ده كانت بتعتمد على الأفلام الاستعراضية والأغاني عمال على بطال ويجي 30 .. 40 رقاصة دفعة واحدة في أي استعراض واصحاب المدرسة دي كان أنور وجدي وأحمد بدرخان
المهم اعتقد مشكلتنا دلوقتي مش العدد لأن في بلاد كتيرة عددهم أكتر مننا بس المواطن كرامته محفوظة فيها
يعني المشكلة مش في العدد ولا حاجة
المشكلة في اللي بيدير
شكراً على هذه الوقفة مع النفس
وليد
ريم بجد فيلم تحفةوبموت فيه ,وبالرغم انى شفته كتير اوى بس كل ما يتعرض بشوفه تانى
مش الاخلاق بس اللى اتراجعت يا ريم كل حاجة اتراجعت فى البلد دى . واحنا اتراجعنا قبل الحكومة . شوفى الواحد دمه بيتحرق كام مرة فى اليوم من السواقة بس وسلوكيات اللى بيسوقوا عربيات . وكام خناقة فى الشغل وفى الشارع ويمكن البيت هو المكان اللوحيد اللى الواحد بيرتاح فيه بس مش معقول هنقضى كل حياتنا فى البيت .
عموما انا باحب زمان اوى وبطبعى باميل لكل قديم ان كان اغانى او افلام . موضوع جميل اوى .
ملحوظة :
انت اتغيرتى شوية بعد الجواز . يعنى بقت مواضيعك اقرب للواقع وكمان التعليقات بتاعتك بقت اكتر اهتمام وبقيتى تقرى الموضوعات بجد وتشاركى فيها بجد . تحياتى لهيثم وليكى وربنا يكرمكوا ويخليكوا لبعض .
ريم
يااااااااااا
من زمان أوي ما بجيش عندك
أولا حمد الله علي السلامة ويا رب تكون اسبانيا عاجبتك لأني مسافر السنة الجاية !
بالنسبة للبوست ، لما افتكرت الفيلم ضحكت : الدوراء فيه سم قاتل !
كانوا ناس طيبين اوي الناس دول!!!
أيام فتاريخ الدول وبتعدي ، وبتحل مكانها أيام تانيه ما يعلم بيها الا ربنا!
أكيد السبب مش العدد ، في دول أكبر مننا وما بتعملش كده .
قضية البلد هي قضية أخلاق ، احنا بقينا شعب ما عندهوش أخلاق .
زمان كانت البنت لما تركب اوتوبيس ، ألف واحد يقوم ويقعدها ، اتفرجي دلوقتي ، لو ما قربش منها وضايقها بس يبقي مؤدب .
زمان كنا بنحترم الكبير ونحن علي الصغير ، كنا بنسمعألم جارنا نطبطب عليه ، كنا بننام بباب بيتنا مفتوح ( أنا طبعا ما حضرتش الأيام دي ، ده هم اللي قالوالي ، أنا جيت بعد ما خربت )
عموما كل سنة وانتي طيبة وعيد سعيد
رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير
فين ايام كل يوم بوست ؟!!
هو فعلا الظاهر من لقى احبابه نسى اصحابه . عموما كل سنة وانتو طيبين وعايزين نطمن عليكوا بس .
ازيك ياريم انا مدخلتش مدونات من زمان بس اما تابعت مدونتك عرفت انك اتجوزتى الف مبروك ياريم وكل سنه وانتى طيبه.........
حلو الربط ده
وعندك حق
بعض منتسبى الحكومات السابقه والحاليه كانوا بيدمروا صحة المواطن مش خايفين عليها اصلا
الشرطة في خدمة الشعب
اهم حاجة عندنا صحة المواطن
الشرطة والشعب في خدمة الحكومة
اهم حاجة عندنا نقرف المواطن في عيشته لحد ما يموت بحسرته
يا سبحااااااان الله
نفس البلد يبقى فيها التغير بالمنظر ده
امال بعد 60 سنة كمان بقى هيبقى في ايه
ربــــــــــنا يـســــــــــــــتر
miro el niro kwaniro
hello... hapi blogging... have a nice day! just visiting here....
فينك من زماااااااااااااااان
طال غيابك يا ريم
عساكي بخير وأفضل حال
طمنينا عليكي
رمضان كريم
علي فكرة الفلم دة جامد جدا وانا بحبة تحياتي
كل ثوره وأنتي طيبه يا ريم
عساكي بخير حال
omg i'm realy don't know that i can image to see like this artical thxx so much for this special artical صور
thx
شركه تنظيف
إرسال تعليق