عندى اسبوع اجازة والمفروض حقضيه مع ماما وجدتى فى الساحل طبعا انا مش مبسوطة لانى حكون محصارة من ماما وكمان جدتى تقريبا عندها حاجة وتمانين بس اللى يشوفها يفتكرها اصغر من ماما عشان متربية على العز واكل الوز والسمنة البلدى والحاجات ديه هى طيبة وحنينة بس متسلطة جدا وبتدخل فى كل حاجة طبعا وماما كمان نبتدى اليوم ريم لازم تفطرى وان مش بحب الفطار نفسى بتكون مسدودة ومتشربيش قهوة عشان خطر على الصحة بتجيب القلب مش عارفة ايه العلاقة وشوية ريم متنزليش البحر الموج عالى جدا ولازم جدتى تحكى لى جوز بنت اخته غرق ازاى مع انه كان عويم وشوية ماما نتلبسيش مايوه حرام البسى مايوه شرعى وبعدين جدتى مش لازم ننزل البحر كفاية علينا نقعد فى التراس ونشوف البحر من هنا رمل وتلزيق وبعد شوية يا بنتى اقفلى القرف اللى بتسمعيه ده هى ديه اغانى ده وجع دماغ افتحلنا رباعيات الخيام ولا سيد درويش ومش فاكرة المغنى التانى اللى بيقول ليه يا بنفسج بتبهج وشوية طبعا بما انهم بيعانوا من الضغط والسكر فالاكل مخصوص من غير ملح ومن غير سكر والادوية والحقن وبتحول للممرضة فترة بعد الضهر ماما بتنام والحمد لله انما جدتى اللى عندها الزهايمر الذاكرة بتنشط وتفتكر حاجات من ايام الهكسوس ولازم اكون منتبهة والا اسمع مالا يرضينى الساعة 9 انشالله بيكونوا داخلين يناموا يا جماعة طب ننزل نخرج نعمل اى منظر لا نامى يا بنتى احسن ريحى جسمك طب بالذمة اريحه من ايه ولو نزلت لوحدى ماما مش بتبطل اتصال بى كانى حتخطف وطبعا جدتى مبتنساش كل يوم انها تقعد تقولى ليه كده يا بنتى مش كان زمانك معاكى تلت اربع عيال انتى اللى مستحملتيش كل الرجالة كده مفيهمش رجل عدل يعنى بالظبط صراع مش مصيف فكرت قلت لماما عشان هى مقيمة فى اسكندرية بلاش الساحل خلينا فى اسكندرية وهى على الاقل ونس بس طبعا قلتلى لا حرام جدتك عايزة تصيف ايه
هناك 18 تعليقًا:
حلو اوى من ايام الهكسوس.. بس معلش بلاش مايوهات كاش ولا اى نوع.. حفاظا عليكى عشان تكونى دايما جوهرة غالية.. لان الناس مش زى بعضها..
ريم ربنا معاكى يا بنتى عموما انا مسافرة مارينا تقريبا فى نفس توقيت سفرك وده اميلى لو تحبى نتقابل theladyofmarena@hotmail.com
صباح الصباح صباحك فل بس انا مسافرة تقريبا قرية شبه مهجورة وانا عشان بحب السباحة بمعرفش اعوم الا بمايوه غالبا مش بيكون حد فى البحر غيرى اشكرك
شاشا ياريت بجد انا كمان نفسى اتعرف عليكى برة النت انا مش رايحة مارينا بس القرية قريبة اوى من مارينا ممكن نتقابل وحبعتلك اميل حالا
ريم الجميلة عايزة أقولك على حاجة .. كلنا بنتخنق أوي من تسلطات أهالينا بس مع ذلك لازم نرضيهم و نريحهم أيا كان و ما تنسيش إن رضا الوالدين من رضا ربنا و قول الرسول الكريم : " رغم أنفه .. من أدرك أبويه و لم يدخل الجنة"
الحمدلله إنها فترة قصيرة و إنك حرة نفسك طول السنة.. استحملي الصيف ده و كله بثوابه
و ياريت وانت مسافرة ما تغيبيش علينا .. و تبقس تزوريني و تزوديني بتعليقاتك الجميلة .. تروحي و تيجي بالسلامة إن شاء الله ..
تحياتي لشخصك الجميل
كوكى انا بموت فيهم وبعشقهم وجدتى شخصية زى العسل بس هم مالهمش فى الخروج ولا السفر وعموما انا واخدة الاب توب معايا حروح منه فين تحياتى يا جميل
ريم
اعملي اللي تحبي تعمليه ، بس من غير ما تجرحي مشاعر حد
________
بالنسبة للرواية اللي في مدونتي ، لقد عرفت رأيك من البداية ، لا داعي لأن تكمليها ، فقراءة الرواية فن ربما لا تجيديه ، أو ربما لا يروق لك هذا النوع من الأدب أو الرواية .
عموما هي رواية تحكي عن أزمة امرأة تعيش في مجتمع غريب عليها ، فتلجأ للعزلة . وبهذا يصف لنا الكاتب مشاعرها ، آلامها ، نظرتها للحياة .
أعرفك فقط أن هذه الرواية حازت واحدة من أفضل الجوائز الاسبانية .
تحياتي
ولا تكوني هذه بهذه الطريقة .
صديقتي ريم
أنا مش زعلان ، وفي العادي أنا ما بزعلش بسرعة . وكمان حريص جدا علي صداقتنا.
دمتي بخير
أتمنى لك إجازة سعيدة
المهم أن تستمتعتي بوقتك وأن تتمكني من استيعاب طلبات الجدة ونصائح الأم، فهمال في النهاية المظلة التي تحاول أن تظلل عليك طريق الحياة
بالنسبة للتعليق الذي تركته لي، فالشخصية الأولى التي تسألين عنها ليست لها مدونة لكنها شخصية مميزة ومحترمة
أما المسألة الثانية، فأقول لك إن التذوق الأدبي أنواع، وكوننا لا نحب نوعا منه لا يعني أن نبدي ضيقنا منه، وعلينا أن يكون صدرنا أكثر اتساعاً لمختلف الآراء
إن أردت الكتابة لي شخصيا راسليني على بريدي الإلكتروني
yasser.thabet@mail.com
مودتي
الصديقة ريم
أتفهم موقفك من هؤلاء الذين تتحدثين عنهم، ولكن عفواً، لا أستطيع نشر تعليقك ولا ردي عليه لأسباب يطول شرحها
إن أردت تفصيلاً أكبر ورأيي في المسألة، رجاء الكتابة لي على بريدي الإلكتروني:
yasser.thabet@gmail.com
اجازه سعيده ياريم
مدونتك حلوه ودمك خفيف عشان كدا هضيفك عندى
تحياتى
احمد يمكن مش بتزعل بسرعة بس بتقفش بسرعة
دكتور ياسر شكرا وانا فاهمة اكيد الموضوع حساس شوية
هانى علوان طبعا انا مش مصدقة ممكن حد يضيفنى عنده حاسة ان مدونتى مش بتقول حاجة بش اشكرك جدا
بجد انا شخصيا مش مسافر علشان خاطرك...وبعدين اية كمية الطاقة السلبيه اللي في الردود دي؟!!
شهريار ايه طاقة سلبية مش فاهمة قصدك
انتي بتتكلمي جد ياريم؟
أصل انا أول مرة أشوف واحدة من اللي بيروحوا مارينا !! وباسمع عنها في التليفزيون بتاع أبو سماعين جارنا المستوظف في مصلحة التلفونات !!
ربنا يديكي الصحة ويبعد عنك البروليتاريا _ طبعا ما تعرفيهاش ....
ماهي البروليتاريا ما بتروحش مارينا ولا بورتو غالب ...
علي فكرة مدونتي اسمها (أهل المحروسة) وباتكلم عن حاجات تانية خااااااالص
ياريت تزوريها وتشرفيني
تحياتي.
الله ينور عليك
إرسال تعليق