الدواء فيه سم قاتل

من كام يوم كده كنا جايبين انا وهيثم مجموعة من الافلام العربى الجديدة اللى نزلت الموسم ده وقلنا نتفرج عليها ونتسلى

شوية وكل منشغل سديهية والله بعد ربع ساعة نطلعها ونشغل التانية عملنا كده تقريبا فى خمس افلام مش فاكرة حتى

اسمياهم ايه وميشرفنيش انى افتكر وندمنا اشد لندم على الفلوس اللى ادفعت واترمت فى الارض اخر مزهقنا بنقلب

فى القنوات لاقينا فيلم على روتانا زمان اسمه بين الحياة والموت تقريبا انتاج الخمسينات الفيلم ده انا كنت بحبه جدا

لانه مرتبط بذكريات الطفولة لما كنت ارجع من المدرسة خصوصا يوم الخميس وبيكون فى فيلم عربى على القناة الثانية

الفيلم ده كان بيتعرض كتير بطولة عماد حمدى ومديحة يسرى والعبقرى يوسف وهبى مش عارفة حتفتكروه ولا

لا المهم عماد حمدى مريض وبنته بتشترى له دواء تركيب من الصيدلية والصيدلى لخبط نسب الدواء والراجل

ده حيموت لو خد الدواء وبعد ما البنت بتمشى الصيدلى بيكتشف الغلطة اللى ارتكبها وبيبتدى يبحث عن عنوان المريض

من خلال الروشتة بتاعة الدواء وصل للدكتور اللى كاتب الروشتة واتصل به واعطاه له العنوان راح للعنوان والبواب

قاله ان الرجل ده عزل من حوالى اسبوع المهم الصيدلى طلع على قسم البوليس وقابل الحكمدار اللى لعب دوره

يوسف وهبى وشرحله الموضوع الحكمدار بلغ الاذاعة اللى كانت بتذيع البيان التالى من حكمدار العاصمة الى المواطن

محمد ابراهيم الساكن فى مصر القديمة لا تشرب الدواء الذى بعثت ابنتك فى احضاره لان الدواء فيه سم قاتل

فيلم اكتر من رائع يشدك من اول دقيقة لاخر ثانية فيه كم كبير من المفارقات والحركات انا وهيثم استغربنا لحال الدنيا

زمان الناس كان عندها اخلاق واحساس الصيدلى مخفش واهتم بانه يوصل للرجل ده باى طريقة عشان ينقذ حياته

سبحان الله لسه كنت بقرا فى جريدة فجر عن الادوية المغشوشة وشركة الادوية اللى بتستورد مادة فاعلة من الصين

بنصف التمن عشان مغشوشة ومضروبة وتصنع منها الدواء ومش مهم كام واحد حيموت ولا يرو ح فى ستين داهية

وافتكرت المواد المسرطنة الى استوردها وزراة الزراعة عشان تدمر الشعب ويتفشى السرطان بين الاطفال والكبار

بشكل رهيب من غير ضمير ولا ذمة وافتكرت اكياس الدم الفاسدة وافتكرت حادثة العبارة وافتكرت حاجات كتيييييييييير

حصلت وبتحصل وحتحصل سبحان الله ايه اللى غير المواطن المصرى الشريف ده كله عشان الفلوس بجد ملعون ابو

الفلوس تصوروا يوسف وهبى قال ايه للصيدلى احنا 2 مليون تفتكر مصر فيها كام واحد اسمه محمد ابراهيم بس لازم

نلاقيه تفتكروا هو ده السبب اننا بقينا 80 مليون يعنى كترنا اوى ومبقاش لينا لازمة وحياتنا مالهاش اهمية والجنيه

اهم بكتير من روح بنى ادم ممكن يموت ولا الاخلاق هى اللى اتغيرت ولا ايه بالظبط عجبتنى اوى فى اخر الفيلم

كلمة قالها يوسف وهبى لمحمد ابراهيم اللى هو عماد حمدى بعد ما اخيرا وصلوله احنا اهم حاجة عندنا صحة المواطن

يااااااااااا تخيلوا معلش 60 سنة قلبوا الدنيا دلوقتى الحكومة بقيت اخر حاجة تهمها صحة المواطن حسبى الله ونعم الوكيل

غيرة الستات

كنا متفقيين انا وهيثم انى اسيب الشغل بعد الجواز عشان شغلى متعب ومرهق وبياخد منى وقت طويل غالبا طول اليوم

ولما بيكون فى جيست كبير او مهم بيكون عندى حالة طؤارى يعنى انسى اروح بيتنا والاعياد والاجازات والكريسماس

كل ده شغل مفيش حاجة اسمها اجازة وطبعا ده مش حينفع بعد الجواز بس بعد ما اخد شهر اجازة حسيت ان الشغل

وحشنى جدا بالرغم من متاعبه خصوصا ان انسانة نشيطة جدا مينفعش اكتفى بالقعدة فى البيت واتفرج علتلفزيون

ولا ارغى فى التيلفون او حتى اضيع وقتى بانى انزل اعمل شوبنج والف فى المولات مش عارفة عموما انا لسه

مقدمتش على الاجازة وبقالى يومين بنزل الشغل لحد محدد بالظبط حعمل ايه بالنسبة للشغل والزملاء اكتشفت ان

الحمد الله فى الغلبية بتحبنى جدا وواحتفلوا بينا انا وهيثم ووجبولنا تورتة كبيرة والاغلبية زرتنا فى البيت وبركت لنا

ماعدا كام حد كده من ضعاف النفوس والاغلبية من الزميلات دايما الغيرة بين الستات والحقد يعنى الرجل مش بيغير

من الرجل الا فى طل الشغل والمافسة انما صعب انه يغير منه عشان اتجوز وهو لسه او انه بيلبس شيك وهو لا

او انه احلى منه وفى ستات بتغير لمجرد انها غيورة وخلاص من غير اى وجه سبب وعندى واحدة او اتنين من

النوعية ديه فى الشغل مثلا وهى بتابركلى ريم كنتى زى القمر فى الفرح بس المكيب كان خفيف شوية وشعرك

كان يجنن بس لو كنت رفعتيه كان حيكون احلى عليكى وده تقريبا اسلوبها معايا على طول من اول ما رحت الشغل

غيرة الستات بينهم وبين بعض مثلا النوعية ديه متحبش تشوف واحدة احلى او اشيك منها لانها متخيلة انها احلى

واحدة ولا حست ان فى واحدة محلوة او شايفة روحها تحب تنغظ عليها مثلا الله الفستان يجنن بس اللون مش لايق مع

لون بشرتك مسمرك شوية او مثلا لو عملت دايت وخست ورشيقة ايه ده مش ممكن خسيتى اوى بس يا خسارة

وشك خس اوى وباين عليه الارهاق والتعب سبحان الله بتكون عندهم قدرة انهم يشككوا الواحد من نفسه بداية علاقتى

مع هيثم مكنش فى حد من الزملاء يعرفها اوى انما بعد اعلان الخطوبة الكل عرف وهيثم شاب مشالله عليه الكل

فى الفندق يحبه ويحترمه فكان فى اكتر من زميلة بترسم عليه منهم صاحبتنا ديه ولما عرفت الموضوع لقيتها

بتتودد منى وتزورنى فى المكتب بالرغم انها عمرها ما عملتها عشان تخترع اكاذيب على هيثم وانه له علاقات

كتير وخدى بالك منه وحاجات كده تخيلوا لما غيرت عربيتى واشتريت عربية فور باى فور ويمكن عشان انا حجمى

صغير شوية فبدل ما تباركلى على العربية بيقولى ايه يا ريم العربية لى انتى مش باينة فيها ديه ايه اللى عجبك

فيها ديه كبيرة عليكى اوى لا تعليق فى نوعية زى ديه من الستات اعوذ بالله منها حاقدة وغيورة ربنا يكفينا شرها

الحمد لله

بعد حوالى شهر من زفافى ااقدر ااقول الاتى اولا للاسف اللى بيمر بتجربة حب فاشلة او زواج او حتى خطوبة وتفشل

بيتعقد بعد كده خصوصا من اى تجربة تانية ولو هى ست بتكره الرجالة ولو رجل بيلعن وجود الستات فى الحياة

مثلا بعد طلاقى كرهت الرجالة موت وكنت بشوفهم كلهم وحشيين وقاسيين وقفلت على قلبى بالقفل من حديد ومكنتش

بدى نفسى اى فرصة انى امر باى علاقة لحد ما ربنا اكرمنى بهيثم اللى كان وجوده فى حياتى صدفة جميلة احمد ربنا

عليها من خلالفترة الخطوبة كان طبعا واضح انه انسان كويس جدا بس انا برضه مريت بنفس التجربة واكتشفت

ان فترة الخطوبة بتكون مختلفة عن الجواز خصوصا مع العشرة يوميا بس الحمد الله مخاوفى انتهت تماما من اول

يوم يمكن لم لقيته اد ايه انسان حنين وطيب ومؤمن بيتستقبل يومه بالصلاة والاذكار وصوته هادئ جدا لدرجة انه

مبيتسمعش وغالبا اول حاجة بيعملها بيطبع على خدى بوسة ناعمة جدا ويتمنى لى صباح جميل ده اللى

فرق كبير بين حد يقوم من النوم والابتسامة على وجهه وحد تانى التكشيرة مش مفارقه والصوت العالى والسب

والشتيمة لوفى حاجة بسيطة اوى مش عجباه بجد فيه رجل ممكن يكرهك الست فى صنف الرجالة بحالها خصوصا

لما يكون عايز يمارس دور سى السيد بمنتهى الجهل واللامبالاة المهم ياريت كل رجل يعمل بو صية رسولنا

رفقا بالقواراير , معلش اضريت امسح البوست اللى فات عشان الصور لان هيثم طلب منى عدم نشر اى صور لى

والصراحة عنده اسبابه المقنعة فبعتذركم على كده

اسبانيا

السلام عليكم جميعا يا زوار مدونتى الكرام والله وحشتونى جدا والحمد الله رجعت لكم

بالسلامة وعدكم لما ارجع احكيلكم على اللى حصل ترتيبات الفرح كانت سريعة جدا

ومتيسرة والحمد لله مكنش فيها اى مشاكل ويمكن عشان كانت تانى تجربة لى مكنتش

متنشة زى اول مرة مفيش قلق من ان الكوافير او المكياج يطلع مش مظبوط ولا الاكل

ميكنش حلو ولا العريس يتاخر وميجيش خالص كنت مكبرة مش عارفة ليه وكنت مخليها

على ربنا واللى يحصل يحصل والحمد لله الحفلة كانت جميلة جدا وبعدها نزلنا يومين فى

الفندق وبعدين طلعنا على اسبانيا وهى بلد جميلة فوق الوصف نظافة ونظام بحسدهم

عليه بجد الناس متحضرة ومبتسمة وتحس انها سعيدة وهى ماشية فى الشارع اكتر حاجة

عجبتنى المواصلات وخصوصا المترو حاجة تجنن نظافة ايه وشياكة ايه ورخيص جدا

اكتر حاجات عجبتنى هناك طبعا ملعب ريال مدريد قصر الحمراء شارع القرانفيلا حديقة

الريتريو فى مدريد والتلفريك فى ماربيا القصر الملكى ومتحف الشمع بصراحة اسبانيا

كلها جميلة والشوارع نظيفة وجوها جميل فى كتير من جو الاسكندرية لانها على البحر

المتوسط والاكل هناك شهى جدا ويفتح النفس خصوصا الفراخ اللى بيشوها وليها تتبيلة

معينة بس طعمها يهو س الشعب ودود جدا وبيحب يساعد السياح والصراحة من اول ما

تنزل من الطيارة بتلاقى الكل مبتسم فى وشك ويتمنى يساعدك بس طبعا المعيشة هناك

غالية موت ومكلفة جدا خصوصا التاكسى بس دخل الفرد مرتفع عشان كده هم مش

بيشتكوا ومبسوطين الشوبنج هناك جميل جدا والملابس والاحذية مالهاش حل بس الاسعار

مولعة طبعا ومشالله الجمال نسبته عالية جدا بالنسبة للجنسين العيون العسلى الواسعة

والبشرة فاتحة والشعر اسود وجميل والاجسام تجنن الكل محتفظ برشاقته متلاقيش حد

بكرش ولا سمين تقريبا معظم الناس بتمارس الرياضة وخصوصا المشى ابسط شئ بالرغم

ان الاكل هناك دسم وشهى جدا بس عندهم هلع اسمه السمنة الشعب الاسبانى قريب شوية

من الشعوب العربية طبعا غير اروبا الباردين يعنى تحس انهم دمهم حامى شوية وملامحم

كمان الى حد ما شرقية اكتر شئ عجبنى ان هناك محدش بيبص على حد ولا بيضايق حد

ولا فى تحرش ولا اى حاجة يعنى ممكن اى حد يلبس الى هو عايز يلبسه ويمشى يعمل

اللى عايز يعمله مفيش اى مشاكل فى اى حاجة نسبة السياحة هناك عالية جدا بالرغم ان

مصر نسبة الاثار فيها اعلى بكتير بس ده راجع طبعا ان فى ثقافة سياحية بتدرس فى

المدارس ووعى عالى جدا من الشعب مش تحرش بالسائحات زى اللى حصل وبيحصل

عندنا يالا مش عايزة اغمكم اسيبكم دلوقتى وللحديث بقية انشالله

عقبال عندكم

لما تمر بتجربة وتفشل فيها بتفكر الف مرة عشان تكررها تانى خصوصا لما بتكون تجربة

طلاق حاجة مصيرية وبتاثر كتير بالسلب عليك وعلى نفسيتك لم خرجت من التجربة ديه

قررت انى عمرى ما حقررها تانى الكلام ده من حوالى ثلاث سنين وفعلا اشتغلت ونسيت

التجربة ديه خالص وبحمد ربنا انى نسيتها ونسيته من حوالى سنة كان فيه زميل لى يالفندق

انسان محترم ومتدين وابن ناس ماسك بوزيشن عالى جدا بالرغم من سنه لسه صغير بس

عشان انسان ناجح وصل للشغل ده المهم هو فى قسم وانا فى قسم تانى خالص وغالبا كنت

بقابله صدفة فى الرسبشين او فى البريك ساعة الغدا لما بتصادف يعنى وممكن يزور حد فى

المكاتب عندنا وتقريبا العلاقة كانت عبارة عن صباح الخير او مساء الخير مش اكتر لحد

من حوالى 8 شهور وفى الاحتفال السنوى للفندق للعامل المثالى العلاقة تتطورت لحوار

وشوية منه عرفت انه بيعرف عنى كل حاجة من اول يوم اشتغلت فيه بالفندق وانه معجب

بى بس مكنش بيحب يقول او يوضح لانه كان شايف انى واخدها جد اوى ومش بدى لحد

فرصة لاى حاجة تطورت العلاقة بسرعة واتعمقت وفاجأنى انه عايز يتجوزنى مش عارفة

فوجئت شاب لم يسبق له الزواج ويملك كل مؤهلات الزوج اللى تتمناه كل بنت فى عريس

المستقبل ممكن يتجوز واحدة مطلقة يعنى تجربة طلاقى مالهاش اى تاثير عليه انا عارفة

انه عارف الموضوع ده بس كررته عليه تانى وهو اكد لى انه عارف والموضوع ده مالوش

اى تاثير عليه لدرجة حتى انه مسالش ايه سبب الانفصال مش عارفة بالرغم انى كنت

مدخلش التجربة ديه تانى بس مع الانسان ده فكرت كتير لانه بجد انسان كويس وشخصيته

جميلة فى اول تعارف للاسرتين جه هو ومامته واخوه طبعا مامته وزى اى ام اكيد متحبش

ابنها يتجوز واحدة متجوزة قبل كده طبعا كان واضح اوى عليها وده انا اخدت بالى منه

انا ومامتى واختى وتانى يوم قلت له على كل ده هو قالى انها مخاوف وهواجس مالهاش

اى اساس من الصحة بالعكس مامته عارفة انه بيحبنى كبرت دماغى خصوصا لما ماما

نصحتنى ان الموضوع ده ممكن يبوظ تانى وبدل ما اكون مطلقة مرة يبقوا اتنين استنى

احسن لما اتجوز واحد يكون مر بنفس التجربة حاولت ابعد شوية بس الصراحة هو كان

مصر ان الموضوع يكمل وانى انا فتاة الاحلام وزوجة المستقبل اللى طول عمره بيحلم

بيها سبحان الله يمكن وفر رمضان اتعزمنا عندهم علفطار وحسيت ان مامته اتغيرت شوية

وبعدين احنا عزمناهم تقريبا فى اخر رمضان ولما استئذن عشان ينزل يصلى التروايح

وماما نامت شوية بعد الفطار قعدت معاها فى التراس ودار بينا حوار مكشوف شوية طبعا

كانت صريحة وقالت لى ان هى مش ممنعة للزواج منى ابدا بالعكس هى معجبة بى

وبشخصيتى بس عايزةتعرف ايه سبب الانفصال الاول قعدت معاها وحكيت لها بمنتهى

الصراحة وبعد اللقاء ده تقريبا بقينا اصحاب اوى وكسرنا الحواجز اللى كانت موجودة بينا

وحددنا ميعاد الفرح واتفقنا انه حيكون خطوبة وكتب كتاب وفرح مع بعضه تقريبا هو كان

مجهز كل حاجة ماعدا الموبيليا نزلنا اشترينها وناقص حاجات بسيطة جدا المشكلة فى ايه

فى انى وزى اى حد يفشل مرة فبيكون ماشى جنب الحيطة ومحاسب اوى على كل حاجة

عشان ميفشلش تانى بحاسب اوى فى تصرفاتى وبتغاضى عن حاجات كتير وده مش من

شخصيتى ان بحب اعيش على طبييعتى اللى يزعل يزعل واللى يتفلق يتفلق بس فى المرة

ديه الوضع مختلف عموما ربنا يسهل ويتمملى على خير يوم الاحد الحفلة وقررنا نعملها

فى الهوا الطلق بحديقة الفيلا فى ستة اكتوبر كان نفسى اعزمكم كلكم بس احنا بنحتفل فيها فى اضيق الحدود ويومين وانشالله نسافر اسبانيا نقضى شهر

العسل هو مش شهر بالظبط اسبوع عسل عقبالكم كلكم يارب اللى متجوزش واللى اتجوز

ايامه كلها تكون عسل فى عسل بستئذنكم باجازة من التدوين وبجد حتوحشونى ومش عارفة

ان كنت حوحشكم ولا حريحكم منى عموما لما ارجع انشالله ححكيلكم اللى حصل

لما الشتا يدق الباب

بدا الشتا بالنسبة لى .بالرغم من ان الجو لسه حر ولحد دلوقتى الظباط والعساكر بيلبسوا البدل البيضا ولكن فصل الخريف

اللى بنودع معاه فصل الصيف ببوخته وغلاسته وحره ورطوبته اللى مش بيطقاه بحب الخريف لما اوراق الشجر بتصفر

وتقع على الارض فى شوارع الزمالك الضيقة ومليانة بالشجر العتيق الكبير فى طريقى للشغل كل يوم بشوف المنظر

الجميل ده وبيخلى مودى احسن شوية لما بحس ان خلاص ايام معدودة والشتا الجميل حيشرف فصل الشتا بيفكرنى

بالضيف اللذيذ اللى قعدته جميلة متشبعش منها وتحاول تمسك فيه وهو ماشى عشان يقعد اكتر او يتغدا معاك بس بيعتذر

بشياكة انه لازم يمشى تقريبا فى الشتا مش بضطر اظبط منبه عشان ااقوم طابور الصباح للمدرسة اللى ورا بيتى

كافى جدا انه يصحينى وبكون مبسوطة وانا صاحية وافتح زجاج الاوضة عشان شمس الشتا الجميلة تدخل اوضتى

وتدفيها وتنورها شمس الشتا بتمنحنى دفء داخلى جميل وبتدينى باور وسعادة تعالوا مع بعض نسمع اغنية على الحجار

الجميلة لما الشتا يدق البابين http://www.youtube.com/watch?v=nXQs1b3IlqM&feature=related

السر

كتاب امريكى لكاتب اسمه روبرت عن تجربة شخصية له اسمه السر وكيف تغير حياتك فى تلات خطوات الكتاب ده اتباع بارقام مهولة وترجم لجميع اللغات

حتى انه وزراة الثقافة السعودية وافقت على توزيعه هناك بس بعد فترة انسحب عشان الشيوخ كفروا الكاتب ده

قصة الكتاب بتتلخص فى ازاى تجذب الاشياء اليك اى حاجة عايزها تكتبها وتؤمن انها حتجيلك حتجيلك لان فى قانون

سرى اسمه قانون الجذب بس زى اى قانون له قواعد واسس اهمها انك لم تتطلب الحاجة ديه تثق تماما فى ان الكون حيوصلهالك

ومفيش مستحيل حتى بعد فترة حتجيلك يعنى حتجيلك مهما كانت امكانيتك ضعيفة وااقل من انك تحصل عليها الكون

بيظبط نفسه وبيوصلهالك لحد عندك المهم انك تكون متفائل دائما وتعتبر ان الحياة ومتطلباتها كتالوج وانت معلكيش

غير انك تختار اللى انت عايزه وتكتبه فى ورقة وعلى ثقة ويقين مليون فى المئة انه حيكون عندك ده مضمون الكتاب

وطبعا الكاتب هنا مذكرش الله سبحانه وتعالى خالص الحمد الله اننا مسلمين ولما بنطلب وبنسال من ربنا وبتكون ثقتنا كبيرة

فيه الكلام ده زى مثلا لما بنقول باب السما بيكون مفتوح كتير بنسمع الكلمة ديه ماما دايما تكون تقولها خصوصا لما اكون

مضايقة وااقول يا رب خدنى او اختى مضايقة من ابنها وتقولها روح فى ستين داهية دايما ماما تقول بلاش ليكون

باب السما مفتوح المقصود طبعا ان فى الوقت الكلمة تتكتب وربنا يلبى الدعاء فدايما لما ندعى بالخير ومعروف ان يوم

الجمعة فى ساعة اجابة وكتير مننا كان بيحلم مثلا بحاجة وعارف انها صعب انها تجيلوه او مستحيل وفجاءة تتحقق بمشيئة

ربنا طبعا انا مثلا كان نفسى فى اغير عربيتى واشترى عربية معينة بس ااقساطها غالية بس لم شفتها عجبتنى وقلت

الله نفسى واتمنيت اركبها وتكون بتاعتى الحمد الله خلال شهور بسيطة مسكت كاريير اعلى والمرتب ارتفع بشكل

سمح لى اشتريها بالرغم الفكرة ديه كانت بعيدة جدا واحدة صاحبتى اتمنت تشتغل فى بنك معين وتسيب الشغل بتاعها

خلال اسبوع عرفت انهم طالبين ناس تشتغل قدمت وربنا وفقها من غير واسطة ولا حاجة الكتاب ده ربنا سبحانه وتعالى

بيقول قل ادعونى استجب لكم صدق الله العظيم ومنملش من الدعاء لان ربنا بيحب العبد اللحوح فى الدعاء واهم من كده

نكون ثقتنا فى ربنا كبيرة انه عمره ما حيخذلنا الكتاب طبعا ولا جاب سيرة ربنا ولا الايمان به وكان الكون اللى حينفذلنا

طلباتنا ورغباتنا بيتحرك لوحده عموما فى جريدة كانت مخصصة اكتر من صفحة عن الموضوع ده واللينك هنا

للى يحب http://www.elfagr.org/TestAjaxNews.aspx?nwsId=10600&secid=2776

ان مارى

ده منظر البحر من الكازينو

طبعا واضحة صورة مكتبة الاسكندرية اللى واخدة الشكل الدائرى لو كبرت الصورة ممكن تشوف تمثال عروس البحر امامها بالظبط والممر اخره الكافيه الجميل

اجمل مكان فى اسكندرية هى الكافيه او الكازينو اللى امام مكتبة الاسكندرية بالظبط جنب خروب سامى وتمثال عروس البحر الجميل مكان جميل

عالبحر علطول ومنظر البحر من هناك ممتع جدا خصوصا لما تكون قاعد وتيجى موجة عالية تبلك برذاذها ياااااااااا

احساس جامد اوى غالبا الكازينو ده المصطفيين ميعرفهاش معروفة لاهل اسكندرية بس فتلاقى الصبح بدرى الناس تنزل

تقعد هناك اللى بيكتب واللى بيرسم واللى بيشعر والى معه حبيبته وعايش انا لما مش بكون حنزل البحر بروح ااقعد هناك

استجم مع نفسى اقرا كتاب او مجلة او كفاية على ااقعد ابص على البحر واتكلم معاه لان فى ذكريات كتير مشتركة بينى

وبينه هو عارفاها كويس ذكريات الطفولة الجميلة لما كنت ااقعد ابنى بيت او تورته من الرمال او اتسلق الصخور على

شط البحر ومش خايفة من الاعشاب اللى بتنبت عليها وبتكون بتزحلق ونتسابق ان وصحبتى ونشوف مين يوصل الاول

واحساسى لما ابتديت ادخل فى مرحلة المراهقة وبداية الانوثة وازاى بقيت اتكسف او احس بنفسى اكتر ان شكلى اتغير

بالمايوه عن السنة اللى فاتت ولازم لم اخرج بسرعة البس الكاش مايوه واول حب كان على شط البحر والجزيرة الجميلة

اللى كانوا نتسابق انا وبابا الله يرحمه مين يوصلها الاول ونقعد هناك انا وهو بالساعات منزهقش ومنضيقش يحكيلى عن

ذكرياته وسفرياته وحوداث الغرق للى كتير كنت حتعرضلها بس لولا ستر ربنا ,الاهم من ده كله الصورة اللى فوق ديه

وهى لواحدة كانت قاعدة ست كبيرة تقريبا معدية الثمانين سنة بس الصورة عشان من جنب مش باينة اوى الست

ديه عجبتنى اوى حبها للبحر وللحياة واول ما شفتها شدت انتباهى مش عشان سنها لا لانها حاطة فول ميكب والوان

صارخة الروج والمانيكير احمر فاقع يمكن انا مقدرش احطه ولبسة فى رقبتها عقد جميل وملامحها بدل على انها

كانت جميلة اوى زمان عينيها زرقاء وشعرها اصفر وبما انى غلسة قاعدة لوحدى وهى قاعدة لوحدها قمت

واستئذنت انى اقعد معاها عرفت عنها انها يونانية ومولودة فى اسكندرية وجوزها يونانى بس مات من زمان واولادها

تركوها وهاجروا كل حد فى بلد وهى اتمسكت انها تقضى بقية حياتها فى الاسكندرية لانها هى بلدها وبتعشق البحر كان

جوزها حلوانى وعنده محل خاص بيه وكان من اشهر وامهر حلوانى فى الاسكندرية فى الاربعينات والخمسينات

تقريبا ساعتين من الزمان جلسنا مع بعض وواضح ان طنط ان مارى ده اسمها كان من زمن متكلمتش مع حد ومحتاجة

تتكلم فحكت لى على حاجات كتير فى حياتها بلهجة عربية مكسرة بس جميلة استمتعت بيها اوى ومعاها اوى وعجبنى انها

لحد دلوقتى مستمتعة بحياتها وبعايشة مع ذكرياتها وبتمارس رياضة المشى ساعة يوميا من جليم للشاطبى مبتركبش اى

موصلات عشان توصل لاى حتة بتعتمد على رجليها وكانت من رواد كازينو بست رودس بس لما قفل بقيت تيجى هنا

اكتشفت ان كل الويتر عارفنها لانها تقريبا كل يوم هناك شوية ولقيت الويتر بينزلها الغدا عبارة عن بيتزا وبيبسى ابتسمت

واستئذنت منها وقمت وانا مبسوطة انا قضيت وقت جميل مع ست جميلة من زمن جميل زمان كان طبيعى وعادى نشوف

نقابل يونانين وايطاليين كتير فى اسكندرية بس مع الوقت انقرضوا تماما غالبا جميع محلات الحلويات والكافيهات كانوا

اصحابها يونانين او طلاينة والاسماء فضلت زى ماهى حتى بعد بيع المحلات ديه لمصريين حتفضل دايما اسكندرية

عروس البحر المتوسط واجمل مكان فى العالم

تركش كوفى

انا من عشاق القهوة بجميع انواعها واشكالها ومذاقاتها واضفاتها بحب اوى طبعا القهوة التركى وبعشق الاتيه وهو عبارة عن قهوة بالشكولاتة معمولة بلبن بس طعمه يجنن اخر حاجة الاسبرسو بيفوق بشكل فظيع الفرابتشينو هو كابتشينو وفيه بول من الا يس كريم او قطع من التلج وكريم شانتيه هو جامد برضه بس للى يحبه الموكا قهوة بالكراميل طعمها لذيذ جدا خصوصا للى بيحبه طعم الكراميل بس اكيد القهوة التركى بتاعتنا هى اللى تكسب خصوصا لما يكون البن محوج بالحبهان والمستكة مجرد انى اشم ريحة البن عموما بحس انى بفوق واحساسى بالكسل بيروح وتقريبا نقطة ضعفى فى الصيام كانت هى موضوع القهوة ديه اول حاجة كنت افكر فيها فنجان القهوة مع الكافيهات الايطالية والامريكية والفرنسية الى غزت القاهرة والاسكندرية تقريبا مفيش مول ولا شارع رئيسى او حيوى او نادى مش فاتح فيه ستار بكس او كوستا او بينوس او سلينترو والبقية تاتى القهوة التركى لحد دلوقتى ليها عشاقها بس مش بنلاقيها فى الكافيهات ديه او قليل لما بتتقدم هناك التين ايدج تقريبا ميعرفوش حاجة عنها لانهما بيتاقبلوا اكتر فى الكافيهات من النوع ديه ومش واخدين على القهوة او حتى الشاى والله مرة سمعت ولد بيقول لصاحبه ايه ده ياابنى انت بيئت كده ليه بتشرب شاى عادى مش ايرل تى ابن اختى مرة كنا فى سيلنترو فلاقنى طلبت قهوة تركى فبصلى اوى كده وقالى ايه ده يا ريما انتى قديمة اوى

العيدية

اصحابى وحبايبى وزوار مدونتى كل سنة وانتم كلكم يارب طيبين وانشالله تكونوا بتقضوا عيد سعيد

عليكم كليكم ,ام بعد ههههىىىىى انا بقى بعد ما صليت العيد وروحت شربت شاى

بلبن مع كام كحكية كده لبست وتوجهت للعمل فورا غالبا كان يوم شاق وطؤارى عيد بقى

والعيد فرحة خلصت علساعة 6 وصلت بيتى 7 مش عايزة غير السرير صحيت وعلمصحيت كان الكل نام وانتهى اول يوم من غير عيدية ولا اى حاجة انهاردة بقى قررت

انى لازم استمتع بالعيد بعد ما خلصت شغلى رحت انا وصحبتى اتغدينا فى بوت علنيل كانت

جميلة جدا والكورنيش مشالله مفيش موضع لقدم شباب واطفال وكبار كله نزل يستمتع علكورنيش

ويشم هوا والجو الحقيقة كان اكتر من رائع مشهد جذبنى جروب واقف علكورنيش ,ومعهم

طبلة ورق وهاتك يا غنى وطبل قلت لصاحبتى الواحد نفسه يعمل كده يتخلى عن المظهر

والستايل ويعيش على طبيعته ببساطته من غير اى قيود ولا عقد كان نفسى فعلا انزل من

العربية واضحك واغنى معهم على الاقل الواحد حيضحك من قلبه ردت على صحبتى وقالتلى

هم كمان نفسهم يعملوا اللى انتى بتعمليه يعنى نفسهم يقعدوا فى السفينة اللى كنتى فيها ويتغدوا

فى نفس المكان امممممممم مش عارفة يمكن عموما محدش عجبه حاله انا ببحث عن السعادة

فى اى مكان ومع صحبة حلوة مش مهم المهم انى اكون سعيدة باى شكل ,بالنسبة للسعادة فى كتاب مكسر الدنيا لكاتبة امريكية بتحكى

فيها تجربتها مع السعادة بعد ما كانت انسانة محطمة زوجة تلاتينية مطلقة واخيرا وبعد ما

لفت العالم اكتشفت ان الاكل والصلاة والحب طرق السعادة وبتحكى عن التجربة ديه

فى كتاب يحمل نفس الاسم eat -pray-love ,واضح ان الكتاب ممتع ابتديت فى قريته

وحاخده معايا اسكندرية بكرة وبعده وحكمل قرءيته الحمد لله قدرت اخد اجازة يومي القراءة كالبحر بتكون ليها طعم مختلف

خصوصا لما يكون البيتش خالى من الزوار زورت جدتى وعيدت عليها وطبعا اخدت منها

العيدية قالتلى لو كنتى جيتى امبارح كنتى حتلمى عيدية كبيرة من خلاينك وخالاتك وقريبينك

قلتلها اعمل ايه يا جدتى اكل العيش عايز كده بس بجد وجودكم فى حياتى اكبر واجمل عيدية

لى

عيد سعيد

اهلا اهلا بالعيد

مرحبا مرحبا بالعيد

اد ايه كلنا بنحب الاغنية ديه مش عارفة ايه السر ان مفيش اى اغانى غيرها للعيد

معلقة مع الناس مع ان صفاء ابوالسعود مش مطربة اساسا وطبعا يا ليلة العيد

موضوع تانى متهيالى مينفعش العيد من غيرها انا عندى طقوس خاصة مينفعش

العيد من غيرها اولا لازم وحتما ولابد البس لبس جديد فى العيد زمان كان كل يوم

طقم جديد بعدها بشوية ممكن طقمين بعدها بكام سنة هو طقم واحد من سنتين تلاتة

ممكن اكتفى باى حاجة جديدة بودى او بنطلون او حتى شوز مش عارفة بعد كده

حيتقلص لايه بس لازم البس حاجة جديدة وخلاص واشتريها يوم الوقفة بالذات ويمكن

ده السبب انى اختصرت المواضيع فى حاجة واحدة عشان بتخنق من الزحمة اوى بس

نزول يوم الوقفة الوضع مختلف ناس واطفال وعواجيز بيكون الاحساس اجمل بكتير

الكل بيكون سعيد اساسى عندى الكحك يوم الوقفة برضه اشتريه وطبعا لما اروح اكله

لانى بموت فيه البالونات لازم تملى الشقة والورود فى كل ركن فى البيت عادة جميلة عودنى عليها بابا الله يرحمه وطبعا

الكوافير اساسى حتى لو كنت لسه عاملة شعرى قبله بيومين بس كوفرت العيد ليها معنى

مختلف اممممممممم ايه تانى يا ريم اه بمسك التيلفون واعيد على كل صحباتى وخالاتى

وعماتى وجداتى وجيرانى والبواب معندناش بس السكيورتى شاغل وغالبا يوم الوقفة

مش بنام لانى عادة برجع متاخر بعد رحلة الشراء والكوافير برجع اكل الكحك والغريبة

واستنى صلاة العيد من فترة قليلة بس ابتديت اصليها والحمد لله ليها احساس شكل تانى

يعنى لو مسمعتهاش ولا صلاتها مش بحس بطعم العيد ومن العادات الجميلة بتاعة المصريين زيارة

المقابر فى العيد اول ما بابا مات كنا حريصين علموضوع ده انا ومامتى واختى والصراحة

محبتهوش خالص فبأجل الزيارة ديه لبعد العيد الايام الاخرناية فى رمضان جميلة ومليئة

بالروحانية ومتهيالى انها هى ديه العيد الحقيقى امممممممممم نسيت ااقول ان العيدية ديه شئ

اساسى عندى حتى لو كانت ربع جنية ومش بصرفها بحوشها لحد متزنق خالص ممكن افكر

اصرفها بس لما تكون ورقها جديد بستخسر اصرفها وبشيلها فى المحفظة تفائلا بيها

كل سنة وانا وانتم والمدونون والمسلمون كلهم طيبين ويارب عيد فطر سعيد

وينعاد علي وعليكم بكل خير وكلوا كحك وعيشوا حياتكم بس بلاش بمب وصواريخ

لانها مزعجة ومؤذيه

لا استنوا مينفعش المرة ديه اى تعليق من غير عيديه يعنى متنفضوش كله يشخلل جيبه

اللهم ما انى صائم

فى ناس بتكون سريعة الاستفزاز والغضب زى انا بالظبط

وانهارده يمكن اكتر يوم استفزيت فيه وغالبا من ساعة منزلت من البيت وانا بقول

اللهم انى صائم الموقف الاولينى لم مش عارفة حتى ظريف كان معلق الاسانسير

فى الدور العاشر واضريت انزل على رجلى الحمد لله انه نزول مش طلوع

ونزلت اشوف السكعرتى انا بحب ادلعه فبيرد بمنتهى البرود ديه مشرفة

الباص بتجيب ولد من الدور العاشر والظاهر مستنيه لسه لما يصحى من النوم فخافت

لحد يسحب الاسانسير الموقف التانى لما السوبر فايزر بتاعنا يعملنا اجتماع قبل

الافطار بنصف ساعة عشان يقولنا ويسعدنا يبسطنا ان العيد ده مشاء الله الشغل

فيه على ودنه وعندنا وفود مهمة فلا للاجازات ومنعا التزويغ منعا باتا والا وقعتك سودة

البيه با طول ما هو قاعد قهوة ف قهوة ف قهوة معندوش مشكلة انا فيه ناس صايمة ونفسها

حتى تشم ريحة فنجان القهوة الموقف التالت لم اكون خلاص بركن ادام البيت والحمد لله

لقيت مكان بسهولة واضح ان ربنا كان حاسس انى قسيت كتير فى اليوم ده فحب يفرحنى

شوية والاقى مامتى بتتصل ريم هاتلنا اى عصير معاكى لحسن نسيت اعمل عصير

طب هو لازم عصير مينفعش ميه ولا بيبسى حتى نفسى اعرف مين اللى اخترع قمر الدين

عشان اخنقه طبعا مجبرة رحت السوبر ماركت الكاشير خلاص قفل عشان الاذان كان على

وشك وبعد متحايلت على المدير شوية ويرضيك بس مامتى تفطر من غير عصير حرام

ميصحش ده فى رمضان ضربلى العصير وخرجت الاقى حد جميل لطيف ابن ؟؟ ولا

بلاش اللهم انى صائم ركن ورايا علطول طبعا مستعجل عايز يشترى عصير يبل به ريقه

هو كمان بس طلع عنده دم وسايب فرامل اليد والسايس الله يكرمه زقها شوية عشان اعرف

اطلع مش عارفة الموقف رقم كام المهم جارتى الجميلة اللذيذة طلعت معايا فى الاسانسير

ريم لو سمحتى معلش البخور اللى بتشغليه رحته قوية اوى وانا عندى حساسية انا تنحت بجد

للمرة العشرين اللهم مانى صائمة يا طنط ازاى احنا ساكنين فى عشش فراخ وبعدين ريحة

البخور توصلك ازاى اصلا يعنى طبعا فى سرى بقول كده وبجد كان يوم مستفز اوى

خصوصا بقى بالليل وانا بفتح المسنجر الاقى صحبتى السعودية وهى بتتشات معايا

كاتبة على رسالتها الخاصة كل عام وانت بخير يا وطنى ولما سالتها قالت لى ايش

متعرفيش لازم اليوم الوطنى للسعوديه لازم اكتب كده المرة ديه مستفزتش اتغظت ليه

معرفش عشان نفسى نكون زيهم ونرجع نحب بلدنا زى الاول واضح ان كراهيتنا للحكومة

كرهتنا فى البلد فى فرق والله

الحمد الله انه عدا على خير يمكن لو مكنتش صايمة كان حصلت حاجات غير كده

اولا مكنش حد حيترحم من لسانى من اول السكعورتى لحد جارتى شفتم بقى ميزة الصايم

انك تقعد تقول اللهم ما انى صايم وتجز على سنانك طول اليوم

الابتسامة

فى مقالة قريتها لدكتور فرنسى فى مجلة الصراحة عجبتنى وقلت اكتبهلم يمكن نستفيد

منها فى حاجة عنوانها كيف تكون سعيدا اولا الدكتور بيقول اول ماتصحى من النوم حاول

تبتسم وتتفاءل من وانت لسه فى السرير بتتمطع واللى بيقوم من النوم مكشر وموده مش

ولابد يحاول يفتكر احداث سعيدة ومبهجة مرت به فى اليوم الى قبله او اللى قبل اللى قبله

او حتى من سنة مش مشكلة او حتى يفتكر رائحة فنجان القهوة اللى مستنيه عشان يشربها استدعاء الروائح المنبهة قادرة على التنبيه والنشاط

تقوم حضرتك من النوم تتوجه مباشرة ناحية الشباك تفتحه

وتحاول تستنشق الاكسجين النقى وانت برضه مبتسم طيب اذا الجو حر ومفيش اصلا

هوا عادى مجرد انك ترى نور الصباح ده يحفز شعورك بالنشاط بعد كده تدخل علحمام

تغسل وشك وتبص فى المراية وانت برضه مبتسم وراضى عن نفسك تغسل سنانك جيد جدا

بالمعجون لان ده حيخليك تنشط اكتر وتشعر بالانتعاش بعد كده تقف تحت الدش وتحاول

انك تسخن الميه اوى وبعدين تبردها اوى كام مرة ورا بعد بسرعة جدا لان ده بيساعد على

نشاط الدورة الدموية وبيزيل شعورك بالخمول والكسل بعد كده يا جميل تدخل المطبخ

وتصنع مشروبك المفضل من القهوة نسكافيه شاى بلبن عصير برتقال الى نفسك فيه المهم

انك قبل ما تشرب تغمض عينيك وتحاول تستنشق رائحة الدخان المصحوب برائحة

المشروب تقريبا اى حد بيشرب قهوة لازم يعمل كده مش عارفة انا بشرب شاى بلبن اول

ما ااقوم من النوم ايه النظام اشمه برضه ولا ايه المهم ان الموضوع ده بينشط الحواس

وينبهها حضرتك بعد كده مفيش قت لازم تلبس هدومك تفتح دولابك والابتسامة لا تفارق

وجهك وتزيل عن نفسك اى شعور بالسخط او ناحية ملابس القديمة او التى لبستها كتير

وتحسس نفسك ان مثلا الفستان ده تصميم ارمانى او البدلة ديه من ايف سان لوران عادى

تنظر لنفسك بزهو وفخر فى المراية وتبتسم ابتسامة جميلة وانت متفاءل ان ستقضى يوم

جيد اول ما تقفل باب الشقة لو قابلت جارك الحشرى الرخم مش مشكلة ولا يهمك اابتسم

وابدا انت بتحية الصباح لو حتركب عربيتك المتهالكة المتواضعة افتخر واحمد ربنا انك

عندك عربية فى غيرك بيتشعبط فى الاتوبيس انما اذا كنت بتتشعبط فى الاتوبيس ابتسم

واحمد ربنا انك تملك ارجل تقودك الى عملك لما توصل الشغل ابتسم فى وجوه زملائك

واشترك معهم بالحديث وحاول ان تختلط بهم وتثنى على اعمالهم ملابسهم يعنى ممكن تقول

لزميلتك ايه الجمال ده ايه الشياكة ديه مش حتخسر حاجة بالعكس حتتحول لانسان محبوب

ومبتسم ومتفاءل وبيختم الدكتور كلامه بان الانسان هو وحده القادر على جعل يومه سعيد

او لا فبالابتسامة التى تبتدى بها يومك يكون لها مفعول السحر على زملائك والمحيطين بك

والرضا والقناعة بانك تملك ما لا يستطيع غيرك ان يملكه يجعلك تثق وتفتخر بنفسك ,كلا م

جميل طبعا الابتسامة اجمل شئ فى الوجود بس بليز قبل ما نبتسم نستعمل معجون الاسنان

ومزيلات رائحة الفم الكريهة من بخاخات او هولز او تشكلتس منتول حتى عشان الابتسامة

متتحولش حاجة تانية اضافة حضفيها من عندى صلاة الصبح قبل النزول من البيت ولو

تقدر تقرا او تسمع قران برضه لها تاثير جامد جدا على حالتك النفسية وتهدءيتها

عانس

البنت فعلا فى سن الصغير من 20 لخمسة وعشرين بتقعد وتحط رجل على رجل وتتشرط

ومن خمسة وعشرين لحد 29 الوضع بيختلف شوية نظرتها بتختلف بيتحس ان خلاص لازم

لازم توافق على العريس المناسب وبتتغاضى عن كتير اوى من متطلبات البيت السعيد

لما توصل ال30 الوضع بيختلف تماما خصوصا لما البنات الى فى سنها بيكونوا اتجوزوا

وقريباتها او جيرانها فى العمارة

وقتها ممكن توافق على اى حد ممكن يتقدم لها مهما كان فى سبيل

انها تهرب من لقب عانس او نظرات الناس ليها والسؤال

البايخ هو الجميل متجوزش ليه لحد دلوقتى وهو الرجالة

اتعموا فى عينيهم لى اصحاب كتير وزملاء

فى الشغل فوق الثلاثتين ولسه متجوزوش

فى منهم اللى عايش حياته عادى ومش همه

وكتير منهم مخنوقة ومضايقة خصوصا لما

مش بتشتغل وقاعدة فى البيت مستنية ابن الحلال

فى امهات بجد بيزودوا الموضوع ده على بناتهم

وتفضل الام تذن على ودن بنتها كل اللى ادك

اتجوز وانتى خايبة ليه وله اى حظك المنيل ده

البنت بتتخنق واول عريس يتقدم لها حتى لو مكنش

مناسب بتوافق على طول وطبعا عشان العريس مش

مناسب نادرا لما الجوازة بتستمر والبنت تطلق

وترجع بيت اهلها وهى ملقبة بالمطلقة وفى المجتمع

بتاعنا ده لقب عانس ارحم بكتير من مطلقة

فياريت كل ام او اب او حتى صديقة

متعدش تذن على ودنها يالا اتجوزى

وفقى لحد امتى حتقولى لا ويسايبوا كل حد فى حاله

عندى بنت صاحبتى عمرها 26 سنة مامتها كل

ما تتخانق معها تقولها يا معنسة وعمرك ما حتتجوزى

وحصلت مرة خناقة ادامى ومامتها قالت الكلمتين دول

ولما سالتها ليه يا طنط بتقولى كده

ردت قالت هو كده البنت لو اتخرجت من الجامعة ولسه متجوزتش

ولا اتخطبت بتكون عانس وعمرها ما حتجوز تخيلوا وبتشتغل مديرة

مدرسة هى ديه المأساة اللى بتعيشها اى بنت بعد الخمسة وعشرين سنة

اكيد اى بنت بتكون نفسها فى بيت واطفال خصوصا وهى لسه فى منتصف العشرينات

وعز انوثتها بس ده مش معناه ان لو مالقيتش الانسان المناسب توافق على

اى حد وخلاص عشان متلقبش بلقب عانس

مأكولات رمضانية

انهارده وبما انى اجازة فانا اللى حضرت الاكل بتاع الفطار والحمد الله طلع يجنن يعنى ماما وطنطو اكلوا اصابعهم وراه

اول صنف واهم صنف الارز بالخلطة او بالمكسرات اللى اكيد كلنا بنحبه سهل وبسيط وحقولكم طريقته

المقادير كالاتى كيلو ارز 2 س ملعقة زبدة 2 ملعقة زيت مرقة دجاج او لحمة ولا مفيش عادى مية 2 ملعقة سكر كمية من الزبيب واللوز او بندق

الطريقة ; نغسل الرز اوى ونصفيه كويس جدا

نضع الزبدة والزيت فى الاناء الحلة يعنى ومعلقتين السكر ونتركه لحد ما يتحول لونه للبنى

نضيف الارز ونقلب

نضيف ملعقة بهارات وملعقة قرفة وملعقة فلفل اسود اكيد اصغر ملعقة وملح طبعاونقلب المكونات كلها مع بعض

نضع اكوب مرقة واتنين كوب ماء ونتركه لحد ما يغلى وبعدين نسيبه على نار هادئة لحد ما يستوى

نحمر الزبيب فى كمية من الزيت نحمص اللوز والبندق فى الفرن

نقوم بغرف الارز فى سرفيس ونضع على الوش المكسرات وبالهناء والشفاء

تانى طبق وهو كان كوردون بلو

لحمة او فراخ الطريقة واحدة لو فراخ حتكون صدورفليه مخليه ولو لحمة حتكون بيفتيك

المقادير 1 كيلو بيفتيك ملح فلفل 2 بيضة بقسماط مطحون دقيق زيت للتحمير جبن بالنسبة للحشو ممكن كل واحد على مزاجه يعنى ممكن جبن شيدر او رومى او موتزريلا مبشور طبعا وممكن زيتون حلقات او هوت دوج او حتى جبنة نستو

الطريقة نتبل البيفتيك بعصير الليمون ورشة فلفل اسود وبهارات وملح وفنجان صغير من اللبن عشان اللحمة تكون طرية

ونتركه ساعةفى التتبيلة

نجيب شريحة البيفتيك ونحشيها وبعدين نقفلها على بعض زى السندوتش كده ونغمسها فى دقيق وبعدين فى البيض وبعدين فى البقسماط

نعمل كده فى شريحة شريحة وبعدين نحطه لمده نصف ساعة فى الفريز

نسخن الزيت الغزير جدا ونقلى الكوردون بلو لحد ما لونه يكون ذهبى ومقرمش وجميل وبون بوتي

تالت طبق ده بيكاتا بصوص الكريمة والمشرم والحلو قطايف محشية بالبلح بس ماما اللى عملت الحلو بكرة الطريقة يا حلوين ايوه نسيت الشوربة كريم دى فالى بكرة برضه الطريقة